Hei yabeh u bood wei chet yaki jait baam yong kiwi won ki jaitbru wa nabaar, boonsien da mylliñ kammon wow chet yei baam tynre yong i hi, wei hajrong kani ka yurim kam chibynta u pynneh pynsah yaki baam tynre, ka Society for Urban and Rural Empowerment (SURE) da pynmih ko ya kawi ka kot wa sikai kammon u chet yei baam tynre waphær waphær yong ki jaitbru Pnar kawa da e pyrtuid “Bam Tynre”.
Hawa yaklam wa u Rev. Dr. H.H. Mohrmen, Secretary SURE ong u wa i poi pynmih yong ki ya kani ka kot toh lyngba kawi ka kaam wa yakrehlang ko waka NESFAS, heiwa da jooh pynman yakob chet baam tynre haki chnong waphær waphær, wei ha kini ki yakob da chem ki wa mih ki jait baam wym poi pyrkhat wei neini da sdang pyrkhat ki wow leh iyi re iyi.
“Embhah i wow em kiwa yakreh kamjooh ki khynnah wa wan pynpliah naki skurbah waphær waphær, heiwa da yarap kylli bniah ki na kiwa chimbynta yei rukom chet, hanla kiwa chimbynta heipor wa chet da leh ki ki kaam ha yung hi khlem i thaw i woh,” ong u Rev. Dr. H.H. Mohrmen.
Ini i kaam wada yakrehlang ka SURE waka NESFAS toh hajrong wa kammon u yoh yei baam wa tei yei doh i pran du dei baam tynre, deiwa sikai yaki bru yaki 10 tylli ki thup baam katkam wa kdaw daka FAO ka UN haka pyrthai waroh kawi, wei lada ye u bam du 5 jait leh da yoh hi yei baam wa tei.
“Chem i wa i baam tynre toh iwa tei yei doh i pran neitæ i daw kwah i wow pynneh pynsah yaki, wei hawa ong i ka riti dustur, ym mut du yei riam, i chaad tynre, tangwa wot i baam leh man ka bynta yong ka riti dustur yong i,” pynrap u Rev. Dr. Mohrmen.
Ha kani ka kot ym em lum thup waroh ki jait baam tangwa dang du ki jait baam wa jop hei yakob wada pynman chaki thaaiñ palatsor waphær waphær.
Ya kani ka kot da pynlait paidbah ynne ka sngi da u Deputy Commissioner ka West Jaiñtia Hills, u Garod LSN Dykes haka yalang wada emlang u Pius Ranee, Executive Director, NESFAS, ka Patricia Mukhim, Editor ka The Shillong Times, ki warep wa kiwi ha Dulong Community Hall, Jowai.
Heiyatoh wa kani ka kot waroh kiwa klam yooluti ki wow yarap ko yaki bru, neibhah ha kini ki sngi boon tip ki u chet du yei bam tynre yong kiwi wot hawa i baam tynre yong i hi man i iwa bha tam neibynta i chait i khiah.
