Ka lehkmen Rongkhli yong ka Raij Nongtalang kawa da pynkhreh wei pynbiang da ka Kur Pohsnem dapoi ko cha wakut ynne ka sngi wei kani ka lehkmen da pynman ka hadien wym em kawon kawon ka kur kamjooh ka Raij Nongtalang wa ye u pynman ka da boon snem kattu.
Ka lehkmen chaad Rongkhli da thut ko hadien u snem 1986 wei da yoh u pynman biang ka ha u snem 2003 iwa da pynman da ka Kur Pohsnem hi hadien 17 snem. Wei hadien neitæ da ye biang u pynman sa du ar sien da kiwi won ki kur hadooh kattæ.
I daw wym ye u pynman tikna ya ka Rongkhli toh neidaw wa tyngkhooh ko wa ka aiñ heiwa nachwa da jooh pynemkaam da u khla wei deiwa sñiawthooh wa man pyrchah aiñ ini wei yow lait i pyndooh ya ka tynre, da pynemkaam dei chyieñ u khla uwa da yap nadooh nachwa.
Iwi na ki daw wa pynman ya ka chaad Rongkhli toh lada jia wa em ka kur kawa toh pynyap khla, hap ki wow e da ka dan ka kuna da ka niam wa ka chaad rong kam ka dak wow burom ya u khla deiwa tlep leh ya oo.
Da em boon ki khla kiwa da yap wei kiwa dadep burom kamni nadooh nachwa wei em leh ki wym pu em yoh wow leh burom. Wei ha kani ka kynti da pynemburom leh du da ki chyieñ yong uni u khla uwa da yap chwa wei uwa dadep tlep nadooh nachwa wei ha ka sngi “Tymmet Khli” wa pynpsiah khla da wanrah du ya iwa dang sah yong u khla wei da thap hapoh yong i dur u khla wa da chna.
Ka lehkmen da sdang ko deiwa pynpsiah ya itæ iwa dang sah yong u khla neiliang yong ka “Phlong Shepshngai” wei da wanrah ya ka Rymmusan heiwa ki chynrang da chaad ki hapyrdi i kieh ka ksiñ ka bhuri hadooh wa che.
Ha ka sngi kawa bood won da man ka sngi Pastieh ki chynrang wei da yalang ha Rymmusan hadien won da wan ka Kur Pohsnem kawa man ka kur kawa pynkhreh pynbait pynbiang ya ka Rongkhli deiwa ya krehlang wa ka Raij Nongtalang. Hakhmat yung ka Kur Pohsnem nyngkong da sdang yei chaad paidbah ki rang pastieh kiwa da riam bha, hadien won da sdang sa ka pastieh wa mar samen hapyrdi uwa mihkhmat na ka Kur Pohsnem pyrchah ya uwa mihkhmat ya ka “Mia Sni” iwa mut ka yung heh yong ka Kur Pohsnem. Neitæ da pynbood sa ka pastieh wa mar samen hapyrdi ki 6 kur kiwa man kiwa seiñ ya ka chnong Nongtalang wei bood won sa ki kur kiwa wan hadien.
Hadien wa pyndep ya ka Pastieh wa mar samen wa ka ngooh ka dem, ki rang pastieh da rah ki ya u khla wei da lai ki cha yung u Lyngdoh wei ha kani leh kamjooh hi da sdang dei chaad Pastieh yong paidbah wei bood won sa ka Pastieh wa mar samen. Hadien ka chaad Pastieh hakhmat yung u Lyngdoh da rah ya u khla ryngkat ka chaad Pastieh cha ka “Phlong Shep Shangai” wei heini leh da pynman biang ki chynrang yei Pastieh wei neini da lai cha ka “Phlong Shloh Shngai” wei bood sa ka chaad ka Pastieh wei hadien wa da pyndep ya ka niam ka rukom da booh noh ya u khla heini wei ki paidbah da liwan ki cha jar jiar ki yung.
Heipor janmiet won dapoi sa ki kynthai wow hiar ha madan yow chaad ya ka chaad wa tip kam ka “Kalang” kiwa da chaad hadooh wa che.
Ynne ka sngi leh kawa man ka sngi wa le, ki kynthai da chimbynta biang ki ha ka chaad Kalang hadooh wa che yow pynkut noh ya ka chaad Rongkhli yong uni u snem.
Iwa man kyrpang yong kani ka chaad Rongkhli ha uni u snem pynyoo ko wym toh ware chaphang u khla uwa kynja doh, tangwa u khla uwa kynja mynsien næ u khla uwa hei mynsien.
Discussion about this post