Jowai: Neidaw wa em kiwa yoh COVID-19 kamjooh wa da em kiwa em hei maa wow yoh ya uni u khñiang wei da emkaam leh wow booddien ya kiwa yachem wa kiwa yoh ya uni u khñiang, yow ye u leh yaki Test wei wow khang kset yow yada yaki paidbah nei poor uni u khñiang.
U District Magistrate ka West Jaiñtia Hills da pynmih hukum u ynne ka 29 tarik yow pynbna ya ki thaw wa em hapoh ka Ladthadlaboh, Caroline Colony, Dongmihsngi, Lumpariat wa Moosalyngkat wow man ki kam ki Containment Area nadooh i pyrdi synyaw ka 29 tarik yow khang yei lai i wan khlem da yoh bor cha kini ki thaw.
Kani ka hukum da khang ko yei psiah ki bru cha kini ki Containment Area, ya kiwa em ha kini ki thaw u hap ki wow chong bait hapoh yung. Ym chah wow pynman ya kiwon kiwon ki yalang paidbah, ki dukan toh u man ki kiwa khang, ki yung krehkaam sorkar wa ki yong ki bru samen toh u man ki kiwa khang kiwa em ha kini ki thaw.
Ya iwa emkaam daw yarap pynbiang da ki bru ki bor pynlai District.
U Incident Command Ladthadlaboh Urban Primary Health Centre daw man u kam u Supervising Officer kini ki Containment Area.
Kani ka hukum ym em krehkaam ko ya kitu ki wakreh Health, ki wakreh (Essential Workers) ka Jowai Municipal Board, ki laad pathai khubor, ki Petrol Pump wa kiwa li booh tadong LPG.
Ya kiwa leh pyrchah daw pynchitom katkam ka aiñ Disaster Management Act, 2005 wa IPC.
