Neidaw wa em kiwa yoh COVID-19 ha ki thaaiñ ka Dong Lumpdang, Mowtyrchiah-A kawa em ha West Jaiñtia Hills District wei da em leh kiwa yachem wa kiwa yoh ya uni u khñiang, kamtæ da emkaam wow booddien ya kiwa yachem wa kiwa yachem pateiñ wa kiwa yoh ya uni u khñiang, u leh Quarantine, u Test, u pynchong kset samen wa kiwi de yow yada nei poor ka khlaam.
Hajrong ini, neiliang u DC ka West Jaiñtia Hills District da pynmih hukum u ynne ka 17 tarik yow pynman ya ka Dong Lumpdang, Mowtyrchah-A kam ka Micro Containment Area chisyndon hadooh wa pynmih hukum da kamwi.
Ka hukum da phah ko ya waroh kiwa em hapoh ka Containment Area wa toh u neh bait ki hapoh yung, ym toh wow mih ki cha lait wei kiwa na baar ym toh wow psiah ki chapoh ka Containment Area.
Da khang wow pynman ya kiwon kiwon ki yalang paidbah, ki dukan leh toh u man ki kiwa khang, kamjooh ki yung krehkaam sorkar wa ki yong ki bru samen wa em hapoh ka Containment Area.
Ki kari wa wan na baar ka Containment Area ye ki wow lai luti napoh ka Containment Area deiwa khlem sangeh hapoh ka Containment Area.
U Incident Commander u man u kam u Supervising Officer kani ka thaw wa da pynman Containment Area.
Kani ka hukum da pynlait ko ya ki wakreh Health, ki wakreh u DC ka District, kiwi ki bru sorkar wa ki wakreh wa yatoh wa ki kaam wym hoi u dam (Essential Services), ki laad pathai khubor wa ki wakreh yow li booh tadong LPG.
Ya kiwa leh pyrchah daw pynchitom katkam ka aiñ Disaster Management Act, 2005 wa ka IPC.
