Neidaw wa em kiwa yoh COVID-19 wei da em leh kiwa em hei maa wow yoh ya uni u khñiang hapoh ka chnong Saphai, kamtæ neiliang u District Magistrate, West Jaiñtia Hills District ha ka hukum wa da pynmih ynne ka 9 tarik da pynbna pynman Micro Containment Area chisyndon ya ka chnong Saphai wa em hapoh ka Laskeiñ Block.
Ya kani ka hukum da pynmih yow ye wow yada nei poor u khñiang khlam, yow ye wow leh ya ki Test, i pynman Quarantine, wow phah chong kset wa kiwi kiwi de.
Ka hukum da khang ko ya kiwon kiwon wow psiah u mih cha kani ka Containment Area wei kiwa em hapoh kani ka thaw wow neh bait ki hapoh yung.
Ym chah wow pynman ya kiwon kiwon ki yalang paidbah, ki yalang niam wa ki kaam khayi pateiñ. Waroh ki dukan, ki yung krehkaam sorkar wa ki yong ki bru u man ki kiwa khang chisyndon hadooh wa pynmih hukum da kamwi.
Waroh ki kari kiwa wan na baar kiwa lai luti ym toh wow sngeh ki hapoh ka Containment Area.
U Incident Commander u man u kam u Supervising Officer kani ka thaw wa pynman Containment Area.
Kani ka hukum ym krehkaam ko ya kitu kiwa kreh ha ki kaam sumaar sukhær, ki bru wakreh u Deputy Commissioner, West Jaiñtia Hills District, Jowai wa kiwi ki heh wa ki wakreh ka sorkar kiwa leh ya ki kaam wym hoi u dam (Essential Services), ki laad pathai khubor wa kiwa li booh tadong LPG.
Kiwon kiwon kiwa leh pyrchah ya ka hukum daw pynchitom katkam ka aiñ Disaster Management Act, 2005 wa IPC.
