Neidaw wa em kiwa yoh COVID-19 kamjooh wa da em kiwa em hei maa wow yoh ya uni u khñiang hapoh ka dong Ringkyrtein ka chnong Moodop (Nartiang), neiliang u District Magistrate, West Jaiñtia Hills da pynmih hukum u ynne ka 18 tarik yow pynbna ya kani ka thaw kam ka Micro Containment Area chisyndon.
Kani ka hukum da khang ko yei psiah wei mih na kani ka thaw wa pynman Containment wei kiwa em hapoh kani ka thaw wow neh bait ki hapoh yung.
Ym chah wow pynman ya kiwon kiwon ki yalang paidbah, ki khayi pateiñ wei waroh ki dukan, ki yung krehkaam ki yong ka sorkar wa ki bru samen kiwa em hapoh ka Containment Area u man ki kiwa khang chisyndon.
Ki kari wa lai luti na kani ka thaw ym toh wow sangeh ki hapoh ka Containment Area.
U Incident Commander u man u kam u Supervising Officer yow pait yei pynkrehkaam ya ka Containment.
Ka hukum ym em khang ko yei kaam ki bru ka chnat i chait i khiah kamjooh ya ki bru wakreh u Deputy Commissioner, West Jaiñtia Hills District, Jowai wa kiwi ki bru sorkar kiwa leh ya ki kaam wym hoi u dam, ki laad pathai khubor wa kiwa lai booh tadong LPG.
Kiwon kiwon kiwa tyngkheiñ ya ka hukum daw chah pynchitom ki katkam ka aiñ Disaster Management Act, 2005 wa ka IPC.
