Ynne ka sngi ka chnong Mulum, West Jaiñtia Hills da pynman ko ya i jied ya u waheh chnong heiwa da wan chimbynta da kiwa chong chnong kynthai wa chynrang kiwa dap 18 snem chaneiñ ha Community Hall ka chnong.
Ya ini i yajied da pynlai da u Dolloi ka Elaka Raliang u Chawas Lyngdoh heiwa da jied biang ya u Biwes Suchiang kam u waheh chnong neibynta ka samoi krehkaam wa 3 snem.
Ha ini i jied da em arngut kiwa yaleh kiwa kynthup ya u Biwes Suchiang uwa da yoh 252 Vote, katwa u Eveningmon Lyngdoh da yoh u 176 Vote. Kiwa chong chnong kiwa da chimbynta da wan ki kamwa 429 ngut, wei ha ini i jied, u Biwes Suchiang da jop em burom u deiwa tam u 76 Vote ya u Eveningmon Lyngdoh.
Hadien ini i jied da pynbna ya kiwa jop da u Dolloi wei da yoh ya ki kyntien kitbok kit rwiang wow kreh chiton wei wow wanrah ya i suk i saiñ, kamjooh i roi i paar hapoh ka chnong.
