Ka Khynroo Khyllood Committee yong ka Seiñraij kam chibynta ka dak i kynmoo warom ya ka lyngkhooh snem yap wa 163 u Kiang Nangbah, ha ka 29 tarik da chim ki wow pynman ka yalang kyrpang neibynta ki khon khynroo khyllood ka Ri-loom Jaiñtia kawa tip kam ka 3rd Kiang Nangbah Youth Conference.
Ya kani ka Conference da pynman ha Yung Dorbar ka Seiñraij heiwa ki khynroo khyllood na ki chnong waphær da wan ki wow chimbynta wei da wai pynemburom leh ya kani ka yalang da u Wanroy Challam, Chief Engineer, PWD Building Govt. of Meghalaya.
Ha ka yalang yahkhmat yong kani ka sngi hei pynlai u Kyrshanlang Kharbuki, Chairman KKC Seiñraij, da yoh i ngoohblai ngoohsyiem na u khynroo Heiniwanda Oo Lato, Asst. Secretary KKC Seiñraij katwa i klam i kappæ wei kyntien e mynsien ya ki khon khynroo khyllood da pachat da u O.H. Toi, President Seiñraij Jowai.
Ki ar ngut ki bru chemphang yong kani ka 3rd Kiang Nangbah Youth Conference toh u Wh. Dawanpoi Passah uwa da klam ha ka phang wa ong “U Kiang Nangbah Kam u Khon Dap Chynrang” wa u khynroo Heirtami Paswet, Member KKC Seiñraij uwa da klam hajrong ka phang wa ong “Ki kaam wa chemphang wa tule yei suk ka pateiñ”.
Neiliang u Wanroy Challam kam u kongsan da ong u hawa klam chaphang u Kiang Nangbah iwa hakhmat kam ki pateiñ kani ka juk toh u booh i leh u dak kylli, iyi i kaamram yong i ya ka ri wa ka jaitbru? Kyrpang chooh leh da kyrsu kyntu wei e mynsien u ya ki khon khynroo khyllood wow man kiwa imsngi u boodlate ya ka yurim u Kiang Nangbah iwa mut wow man kiwa chlur, wa hok wa yatylli wei em i mynsien yaichah.
Discussion about this post