Jowai: Ka Dorbar Elaka yong ka Elaka Jowai da man ko ynne ka sngi ha Yungwalieh ka Dorbar Chnong Dulong, Jowai heiwa da wan chimbynta ha kani ka dorbar da ki khon ka Elaka wa wan na kylleiñ ki chnong ka Elaka wa kynthup ya ki Waheh Chnong kamjooh leh ki waheh wasian.
Ha kani ka Dorbar u Dolloi ka Elaka, u Puramon Kynjing da man u kam u chongknor heiwa da wanrah ya ka phang yaklam hajrong ka Dustur Riti Synchaar Elaka, kawa man ka aiñ wa ki kyndon yong ka rukom im wa ka dustur hapoh ka Elaka.
Ha kani ka aiñ kawa da pynkhreh (Draft) da em ki kyndon wa yatoh wa ka Synchaar Khadar wa ki bor, ki Dorbar hapoh Elaka, I chongkha chongman, i kylla kur, ki kaam wow pait da u Dolloi wa kiwi kiwi.
Neiliang kiwa chimbynta ha kani ka Dorbar da pachat ki ya jar jiar ki yumut heiwa kiwa boon hi da tyrwa ki wow e por chooh chooh wow puræ wei wow pynjanai ya ka.
Chooh chooh da yaklam leh hajrong i pynbait ya u pood u ang ki chnong wa ki Raij, wa kiwi kiwi.
Ha kani ka dorbar da jied ya kiwa kitkaam ka dorbar heiwa u Dolloi u man u kam u Chairman, u Secretary toh u Wansalan E Dhar, u Asst. Secretary, u Junemon Paswet, u Treasurer u Pyrkhat Shylla katwa ki dkhot won yong ka Executive Dorbar u kynthup ki ya ki President/General Secretary yong ki Raij hapoh ka Elaka; kiwi ki dkhot wa 23 ngut kiwa kynthup ya 17 ngut ki chynrang wa 6 ngut ki kynthai.
Discussion about this post