Jowai: Ka Meghalaya State Rural Livelihood Society chirup i ya krehlang wa ka Indian Post Payment Bank ynne ka sngi da e sikai ko neibynta ki Financial Literacy Cadre wa ki Bank Sakhi hajrong ka Financial Literacy namo kammon u tip u sñiawthooh ki hei yatoh wei rukom pyllang ya ka poisa poilaiñ haka yalang wada pynman ha GHM Hotel Jowai.
Kini ki Financial Literacy Cadre waki Bank Sakhi toh ki dkhot yong ka Self Help Group kiwa da em i tip i stat ha ki thaaiñ palatsor wei kiwa da yoh leh i sikai waphær waphær wa yatoh wa ki rukom e chakri ki Bank.
I pynman ya kam kani ka esikai toh hajrong ka thong wow pynku yei tip i sñiawthooh ki paidbah heiliang i rukom pynlang poisa cha ki thaaiñ palatsor, neibhah hadien wa kini ki Financial Literacy Cadre wa ki Bank Sakhi da chah hikai ki daw sikai kylla won ki ya ki paidbah cha ki thaaiñ yong ki.
Ha kani ka sngi hajrong i e sikai yei rukom pynlang poisa da pynche leh ya kiwa boon i chakri wa ye u yoh lyngba ka India Post Payment Bank wa kynthup yeiwa kammon wow wai Account, u booh wei wow chim poisa, u phah poisa, u su yeiwon iwon i jait su wa kiwi kiwi ki laad yarap dei wym emkaam de ki wow lai cha jngai.
Heijooh i por da pynche leh yei myntoi wa smat u yoh deiwa pynpsiah pyrtuid ha u Aadhaar wei kammon pynsuk u heiliang i su yeiwon iwon i jait su.
Neiliang u Project Director DRDA ka West Jaiñtia Hill District u PK Boro, da kyntu u ya ki paidbah wow chim kabu ki yei stat ka juk thymme wada wanrah neibynta i myntoi yong ki hi.
Kiwi won wa da e i klam ha kani ka sngi toh u Navin Deshmuk, AGM IPPB; u VIMAL Kumar, Senior Manager IPPB; u Alok Kumat Singh, Assistant Senior Manager; u Ravish Srivastav, Manager Khliehriat, IPPB; u Babu Lakhnotra, Assistant Manager Jowai; u Abishek Paul, Assistant Manager; u Rolin Shadap, District Manager ka Meghalaya State Rural Livelihoods Society.
Discussion about this post