Shillong: Ka esikai namo ka Workshop hajrong ka phang “Development of Piggery Value Chain Ecosystem for Cooperative Sector in North East Region” wa pynman da ka National Cooperative Development Corporation (NCDC), ICAR wa ka sorkar jylla da pynman ya ka ha State Convention Centre, Shillong heiwa u symbood montri rangbah ka jylla, u Prestone Tynsong da man u kam u kongsan.
Hawa wai ya kani ka esikai, u Prestone da ong u wa da toh u pynemkaam ya ka stat wa man katni (Latest Technology) wot hadooh wow psan sniang wei kani ka esikai u man ko kawa myntoi ya ki warep ha ki sngi wa ki por wow wan ha ka thaaiñ mihsngi deiwa kyntu ya ki jylla wa chimbynta wow chim kabu na kani ka esikai.
Chwa ini neiliang u KN Kumar, uwa man kam u Agriculture Production Commissioner, Govt. of Meghalaya hawa e ya ki kyntien pdiang burom da pyntip u 75% na ki bru hapoh ka thaaiñ mihsngi toh kiwa baam doh sniang tangwa ya ki sniang da psan dei rukom warim ymtoh katkam ka stat ka juk wa katni (Scientific) iwa da ktah yei wow pyndap yei dawa dohsniang ki bru.
Da pyntip u leh wa ka thong yong kani ka esikai toh o pynchlur ya i psan sniang katkam ka stat Science wa katni wei wow pynjanai ya i rukom psan sniang ha ka thaaiñ.
Kiwi kiwa da klam ha kani ka sngi toh u Sundeep K Nayak, IAS, Managing Director, NCDC wa u Dr. JK Jena, DDG (Animal Sciences), ICAR, hei emlang u Secretary, AH & Veterinary, Meghalaya, Dr. Manjunatha, Director, AH&Veterinary, Meghalaya u Dr C Shilla wei da wan chimbynta da ki bru chemphang na Assam, Arunachal Pradesh, Nagaland, Mizoram, Sikkim wa Tripura.
Neiliang u MD, NCDC da ekti u leh ya ka cheque wa T. 34, 52, 52, 800 cha u Prestone Tynsong kawa man wow pynkrehkaam ya ka Meghalaya Milk Mission.
Discussion about this post