Jowai: Kam chibynta India International Cherry Blossom Festival 2018 kawa pynman ha Shillong, da pynman leh ya ka “International Workshop cum Seminar on Judo” kawa ar sngi hei ya krehlang waka yung krehkaam ka Directorate of Sports & Youth Affairs, Meghalaya wei ya kani ka Workshop da pynman ha Laban Sports Club Indoor Hall.
Ha kani ka Workshop da emlang leh u Kyohei Yamamoto, Researcher/Adviser (Economics), Embassy of Japan wa u Sensei Banee Brata Das, General Secretary, All Assam Judo Association wa ki dkhot ka Meghalaya Judo Association.
Ha ka sngi pynkut ha ka 16 tarik u kongsan, u Allantry F Dkhar da pynkynmoo u wa ka yalehke Judo toh kawa sdang ha u snem 1882 wei man ko kawi na ki jait yalehke Martial Arts kawa dadep pynman leh ha ka Olympic Games nadooh u snem 1964 hadooh 1984 neibynta ki chynrang wa kynthai leh kamjooh.
Ka Workshop cum Seminar on Judo da wanrah lang ko i yachemlang ki khynnah yalehke na Meghalaya, SAI STC Shillong wa Assam deilang wa kiwi de kiwa sikai Martial Arts kiwa pyrchang wow pynkyu lang ya ka yalehke Judo kawa man dang du ka na ki jait yalehke Martial Arts wa ha khmat dooh wow u embynta ha ka Olympic Games.
Uwa bniah bha ha ka Judo namo u Expert na Japan u Sensei Hiroyuki Mizuno, KODOKAN Judo 8th Dan, IJF Continental Referee kam uwi na kiwa sikai leh ha ka Judo, u Saundarjya Prasad Chaliha Gold Medalist ha ka Commonwealth Judo Championship kawa dang dep pynman ha Jaipur nadooh ka 4–11 tarik uni u bnai da emlang u wa u Amit Vishwakarma, SAI Judo Coach kiwa da pynyoo wei wow e sikai ya ka rukom yalehke Judo.
Kani leh man ko kam i pynkhreh cha ka National Games 2022 wei ki khynnah yalehke ka SAI STC Shillong da pynyoo ki leh ya i sap yalehke Judo ha ka sngi pynkut noh ya ka Cherry Blossom Festival 2018 hapoh i yahkhmat u Sensei na Japan.
Discussion about this post