Ampati: Dei thmu wow pynchlur ya ki bru samen wa wan na ki SC/ST wow sdang ki i yong ki hi i khih da pynman ya ka esikai namo ka Awareness Campaign hapoh yong ka National SC/ST Hub Scheme ha BADO Multi Facility Centre hajan Ampati.
Ya kani ka Campaign da pynman da ka District Commerce and Industries Centre (DCIC), Ampati, South West Garo Hills heiwa da wan chimbynta da ki spah ngut kiwa em hapyrdi 18 wa 45 snem i rta.
Ka National SC/ST Hub (NSSH) toh kawa sdang da ka sorkar pyrdi wow pynchlur ya ki khynroo wow sdang ki dei yong ki hi i kreh khamtam kiwa wan na ki jaitbru wa haap hapoh SC/ST.
Ka DC yong ka South West Garo Hills, ka Hazel DB Sangma kam ka kongsan ha kani ka sngi da kyntu ko ya kiwa chimbynta wow pynemkaam yei stat wa yoh ki na kani ka esikai neibhah katni ki khynroo khyllood ymtoh de u chaniah ki yei kreh sorkar wei da toh u pynkylla noh yeini i pyrkhat.
Da ong ko wa heithaw wow chaniah yei kreh sorkar emkaam ya ki khynroo khyllood wow chim kabu ki ya ki laad yarap wa e ka sorkar.
Neiliang u General Manager, DCIC, Ampati, u DFR Marak hawa klam hajrong ka Scheme NSSH da ong u wa i rukom pyrkhat wa phær toh iwa emkaam tam wow man kiwa poi thong ha kani ka juk wa katni.
Ha kani ka esikai da em leh ki bru chemphang na ka State Bank of India wa ka IBDLP kiwa da pynche ya ki laad yarap wa ye u yoh na ki.
Kiwi kiwa da klam toh u SBI Ampati Branch Manager, u L Khongsai wa u South West Garo Hills Basin Development Unit District Programme Manager, u Brilliar Ch Sangma.
Discussion about this post