Da pynman ya ka esikai ya ki mistri wow chna ya ki yung wa skem hanlada khih u khmi

Jowai: Kam chibynta wow pynsñiawthooh ya ki mistri heiyatoh wa kammon u chna yaki yung ki sem wow man kiwa skem wa chkeh ki wow neh lada jia wa khih khmi heiwon iwon i por, neiliang ka District Disaster Management Authority, West Jaiñtia Hills da pynman ko ya ka e sikai wa kyrpang wa chisngi ya ki mistri ynnin ka sngi ha Conference Hall u Deputy Commissioner ka West Jaiñtia Hills District.

Ki bru chemphang wa wan e batai pynche ha kani ka sngi da batai ki nadooh i rukom pynchong pynthiah ya ki beam, i thaaiñ naar, i rukom khleh khyndaw wow ya biang nadooh ka um, u chyiap, u mooria wa kiwi khnang yow yoh yaka yung kawa chkeh wow yada hawa khih khmi.

Neiliang u Chanmitre Shullai E.E.PWD Building Jowai, da e u i batai bniah hei yatoh wa i rukom chna yung haki thaw wa jooh khih khmi man ki por, katwa hei yatoh waka Building By-law waki Non Structural Element won da e i batai bniah da u Reginald Nongkhlaw, Engineer District Urban Planner.

Nalor kiwa boon ki mistri wa da wan wow embynta ha kani ka sngi da em leh u DDMA Jowai u Ebormi Langshiang wa kiwi kiwi.