Jowai: Ka seiñ SURE da pynman ko ya ka National Youth Day & Week Program ha chnong Mukhla Nongrim hei ya khrehlang waka Nehru Yuva Kendra Sangathan, West Jaiñtia Hills District.
Ya kani ka program da sdang nadooh ka 12 tarik u Duiyatra (Jan) wei da pynkut ha ka 19 tarik u jooh u bnai.
Ha ka sngi sdang, kawi na kiwa kreh ka SURE ka Deadidakami Mohrmen da pyntip ko wa ka SURE toh ka Faith Based Organization. Ka SURE da leh ko chiboon ki kaam khamtam ya ki warep cha nongkyndong, da pyntip ko leh wa hadooh katni ka NABARD da booh ko ya i dukan ha Iawmusiang kawa e laad ya ki SHG waphær waphær u booh ya ki mar yong ki wow pynlai yaw ki.
Neiliang u Secretary Youth Club, Mukhla Nongrim, da pynsñiaw u ya i sñiawngooh ya ka SURE wa ya ka NYK kiwa da wanrah ya kani ka Program ha chnong yong ki wei da kyrpaad u ya ki dkhot ka Youth Club ka Mukhla Nongrim deilang wa ki para chnong para thaw wow khrehlang ki ha kani ka program ha ki yalehke wa boonjait nadooh ka 13 hadooh ka 19 tarik.
Ha kani ka yalang da yoh i klam na ka Presila Dora Suting kawa man ka National Youth Volunteer na ka NYK heiwa da pyntip ko wa ye u yarap ha kiwa boon ki liang neibynta ki khynroo khyllood deiwa chna ya ki Youth Club kamjooh wow pynku ya ki khynroo Khyllood ha ka imlang sahlang waroh kawi.
Ka kongsan ha kani ka sngi ka J. Synnah kawa man kam ka District Social Welfare Officer hei klam yong ka da e mynsien ko ya ki khynroo khyllood wow chimbynta ki ha kini ki program. Ha kani ka jooh ka sngi da em leh ka Awareness Programme hajrong ka phang “Substance Abuse” heiwa ki bru chemphang da pynsñiawthooh ki ya ki khynroo khyllood chaphang i ma yong kini ki jait dih waphær waphær.
Ha kani ka tayaw lehkmen yong ki khynroo khyllood da em boonjait ki yalehke kam ki yakop rwai, ka Football Tournament, yakop draw wa ki yalehke tynre.
Ha ka sngi khaddooh 19 tarik da pynwai ya ka programme da ka Daka Bareh kawa kreh yong ka SURE wei da saam ya ki prize cha kiwa chimbynta.
Discussion about this post