Kam chibynta i lehkmen ya ka Azadi ka Amrit Mahotsav kawa man leh i lehkmen yei dap 75 snem i yoh laitlooid ka ri India, ynne ka 31 tarik ka yung krehkaam u BDO, Mairang C&RD Block deiwa ya krehlang wa ki Village Employment Council (VEC) yong ka Mairang C&RD Block, da pynman ya ka Block Level Awareness Programme ha Tirot Sing Memorial Hall, Pyndengumiong, Mairang heiwa u Metbah Lyngdoh uwa man u Lamphang ka Yung Dorbar Chna Aiñ ka jylla wei man u leh u MLA ka thaaiñ da wan u kam u kongsan ha i synrsan yong u Jambor War uwa man u EM ka Khasi Hills Autonomous District Council (KHADC) uwa pait ya ka chnat Elaka wei uwa man leh u MDC ka Pariong-Mawthadraishan Constituency uwa da wan kam u symbood kongsan ha katai ka yalang.
Kiwi kiwi won kiwa da em ha kani ka yalang kynthup ki ya u Additional Deputy Commissioner wa pait ya ka Mairang Civil Sub-Division, u A. Nongbri, u Block Development Officer ka Mairang C&RD Block, u V. Swer, ki sahep wa ki wakreh yong ki chnat waphær waphær yong ka sorkar, ki Sordar chnong ka thaaiñ deilang wa ki Chairman wa Secretary yong ki VEC waphær waphær kiwa em hapoh ka Mairang Block.
Ha kani ka yalang da yoh i batai wa i pynche paidbah hajrong kiwa boon ki Scheme wa kynthup ya ka MGNREGA, PMAY, NRLM wa kiwi de da ki sahep yong ka chnat Agriculture, Animal Husbandry & Veterinary, Fishery, Health & Family Welfare wa na u Branch Manager ka Meghalaya Rural Bank, Mairang Branch.
Hawa klam kam u kongsan, u Metbah Lyngdoh da pynsñiaw u ya i kmen wow ya embynta ha kani ka lehkmen ya ka Azadi ka Amrit Mahotsav wei da ong u leh wa kani ka Block Awareness Programme da man ko ka rynsan ya ki chnat sorkar waphær waphær wow pynche paidbah hajrong ki Scheme kiwa jooh pynkrehkaam neibynta i myntoi yong ki paidbah wa chong chnong yong ka jylla.
U Metbah da kyntu u leh ya waroh kiwa da ya wan wow chimbynta ha kam kini ki yalang kiwa man kam ki laad ya ki wow kyntu ya i yoh i kot yong ki paidbah wa chong chnong, ka yung ka sem yong ki wa ka imlang sahlang kamjooh.
Hawa klam ya i long i man ha ka ri wa ka jylla neidaw yong ka khlam COVID-19, u Metbah da kyntu biang u ya ki paidbah wa chong chnong ki wym pu em chim ya i tika yada COVID-19 wow lai e ya i tika kam chibynta wow yada na i poor yong kani ka khlam ha ka jylla wa ka ri India hi waroh kawi.
U symbood kongsan, u Jambor War hei klam yong oo, da ong u wa ka Azadi Ka Amrit Mahotsav man ko ka kabu ya ka ri India wow kynmoo warom yei chlur wei yei mylliñ ya idæ da kiwa yaleh laitlooid ka ri kiwa kynthup ya u Tirot Sing Syiem, u Kiang Nangbah wa u Pa Togan Sangma ki bru yaleh laitlooid na Ri-loom Khasi, Jaiñtia wa Garo yong ka jylla Meghalaya wei da ong u leh wa ka Mahotsav man ko leh kam ka lehkmen ya i roi i paar yong ka ri hawa kiwa boon ki liang ha ki 75 snem wa da lai nadooh wa da yoh laitlooid na i synchaar yong ka sorkar pharæng.
Da pynphooh pynphieñ leh ya kani ka sngi da ki yalehke Skit wa ki rwai maya ri kiwa da pynyoo wei kiwa da rwai da ki dkhot yong ki VEC waphær waphær yong ka Mairang Block.
