Kam chibynta i lehkmen yei dap 50 snem yong ka jylla Meghalaya, ka yung krehkaam u Block Development Officer, Mairang C&RD Block deiwa ya krehlang waka Meghalaya State Rural Livelihood Society (MSRLS) ynne ka sngi da pynman ki ya ka Self Help Group (SHG) Mela waka Health Camp ha Madan Mot Tirot, Mairang Mission, Mairang heiwa u Lamphang ka Yung Dorbar Chna-aiñ ka jylla uwa man leh u MLA ka thañn, u Metbah Lyngdoh da man u kam kongsan hei ya emlang u EM ka KHADC uwa pait ya ka chnat Elaka uwa man leh u MDC ka Mawthadraishan, u Jambor War uwa da wan kam u symbood kongsan.
Kiwi de kiwa da ya emlang ha kani ka yalang kynthup ki ya u Syiem yong ka Hima Nongkhlaw, u Paiem P.M. Syiemlieh, u Additional Deputy Commissioner wa pait ya ka Mairang Civil Sub-Division, u A. Nongbri, u Block Development Officer ka Mairang C&RD Block, u V. Swer, u Chief Operating Officer ka Meghalaya State Rural Livelihood Society (MSRLS), Shillong, u Ronald Kynta, ki wakreh yong ki chnat sorkar waphær waphær, kiwa yahkhmat ki chnong ka thaaiñ wa ki dkhot yong ki Village Organisation (VO) wa ki SHG waphær waphær hapoh ka Mairang Block.
Hawa klam kam u kongsan, u Metbah Lyngdoh da pynsñiaw u yei kmen wa yoh u embynta ha kani ka yalang wei hawa klam hajrong ka National Rural Livelihood Mission (NRLM), u Metbah da ong u wa i thmu yong kani ka Mission toh wow kyntu ya i yoh i kot yong ki paidbah kiwa chong ha ki thaaiñ palatsor wei da kyntu u leh ya waroh wow ya chimbynta ryntih ha ki kaam wa em hapoh kani ka Mission neibynta wow kyntu ya i yoh i kot i yong ki.
Hajrong i dap 50 snem yong ka jylla Meghalaya, u Metbah da kyntu u ya ki paidbah wa chong chnong wow pteiñ ki wow ya ksohkti lang wa ka sorkar ha ki kaam pynroi waphær waphær yong ka neibynta i roi i paar yong ki paidbah wa chong chnong ka jylla.
U Metbah da kyntu u leh ya ki paidbah wa chnong chnong ki wym pu chim yei tika yada COVID-19 wow lai chim smat ki neibhah wa toh du nei e tika wa man ka laad yada nei poor yong kani ka khlam khlam ha ka ri wa ka jylla.
Neiliang u symbood kongsan, u Jambor War, da klam u hajrong i embynta yong oo wa ki SHG ha ki por wa da lai noh wei da ong u leh wa ki paidbah wa chong chnong, khamtam ki kynthai da yoh myntoi bha ki nei em ki SHG kiwa da wai laad wow ya chimbynta ha i roi i paar wa i yoh i kot yong ka jylla.
Ha kani ka yalang da sakhi leh yei pynche paidbah hajrong kiwa boon ki Scheme sorkar wei da yoh leh yei chaad, i rwai wa ki Skit da ki dkhot yong ki VO wa SHG waphær waphær yong ka Mairang Block. Da yoh leh wow saam khusnam cha ki VO wa SHG waphær waphær ha kani ka yalang.
