Jowai: Ka yung krehkaam u District Public Relations Officer yong ka East Jaiñtia Hills chirup wei ya krehlang wa ka yung krehkaam u Deputy Commissioner ka District wa kiwi kiwi ki tnat da pynman ko ya ka Special Interactive Programme Cum Office Expo 2018 ynne ka sngi ha Jaiñtia Eastern College, Khliehriat.
Ha kani ka sngi da em ka yalang ha pchem kani ka thaw puræ ya kawa da pynlai da u DPRO ka District u R. Susngi heiwa u DC ka District, u FM Dopth da man u kam u kongsan, hei emlang ki sahep na ki tnat waphær waphær hapoh ka District.
Ha ka yalang da yoh yei klam na ki sahep ki tnat sorkar kiwa da e i batai wa i pynche ya ki scheme sorkar wa ki kaam kiwa kreh ki.
Neiliang u FM Dopth hawa e i klam da ong u wa ini man i i kaam wa khian wa dang sdang deiwa yooluti wa daw pynheh pynkmai ya ka ha ki snem wow wan.
Da ong u leh wa i kaam wa kongsan tam katkam wa man katni hapoh ka district toh i e dawai Measles wa Rubella wa ka scheme wa tip kam ka Pooshan Maa namo ka scheme wow pynbiang ya ki baam cha ki manbei, ki khynnah wa kiwa pun-khon.
Ha kani ka sngi da em hadooh 13 tylli ki tnat kiwa da booh dukan namo ki stall heiwa da dai ya ki tiar wa pynmih ki tnat, da e i batai hajrong ki rukom krehkaam yong ki wei da batai leh chaphang ki scheme sorkar waphær waphær.
Ki tnat wa da wan ynne ka sngi kynthup ki ya ka District Industries Centre, ka tnat i chait i khiah, tnat dakha, i puræ puthi wa kiwi kiwi.
Discussion about this post