Jowai: Ka Border People Development Organization (BDPO) hei ya krehlang wa ka Nehru Yuva Kendra, Jowai da pynman ko ya ka Village Level Youth Parliament, ha kani ka 13 tarik ha chnong Lumlakhiat, kawa da wan chimbynta da ki wa chong chnong nadooh ki manbei manpa ki khynnah wa ki khynroo khyllood.
Ka phang kani ka yalang toh “I kordor i lehkhooid” iwa da klam da u B. Kyndait dkhot ka BPDO uwa da ong wa i lehkhooid nyngkong toh u sdang i na samen wa ha yung ha sem wa ha ka imlang sahlang wei emkaam u khooid u dohnood ha ka imlang sahlang kamjooh ha yung ha sem.
Da yoh leh ya i klam na u R. Thubru, dkhot ka BPDO uwa da klam chooh chooh chaphang i lehkhooid deiwa e nongmuna hajrong ka phang deiwa ong wa i lehkhooid man ko ka spah bah hei rukom im u bru neibhah dei lehkhooid u yoh i yei chait i khiah wei kamjooh leh miat ki yung ki sem kamjooh ka imlang sahlang.
Hadien ini da yoh won ya i klam na u D. Lyngdoh, National Youth Volunteer NYKS Jowai, uwa klam hajrong ka jooh ka phang wei da ong u wa emkaam bha u leh khooid khamtam cha ki chnong nongkyndong kiwa dang boon ki dieñ ki siej kiwa da kyrkhu chwa da ka bei rymaw wei lada ka chnong man ko kawa khooid daw man ko kam kawi na ki thaw uiñke suwari kamwa man ka chnong Mawlynnong kawa pawnaam yei leh khooid iwa da wanrah ya i kylla ha ka imlang sahlang.
Discussion about this post