Shillong: Ka Ministry of New and Renewable Energy (MNRE), hei yakrehlang wa ka World Bank wa ka State Bank of India (SBI), ynne da pynman ki ya ka Solar Rooftop Technical Assistance Workshop hajrong ka phang ‘Senior Management Consultation on Development of Grid Connected Rooftop PV (GRPV) Program in Meghalaya’ ha State Convention Centre, Shillong, heiwa u W.M.S. Pariat, Chairman, Meghalaya State Electricity Regulatory Commission, da man u kam u kongsan.
U Pariat hei klam yong oo da ong u wa iwa kongsan dooh toh wow yakrehlang chirup khnang wa ka thong yong kani ka program u man ko kawa jop wei emkaam leh wow sdang u leh yeini deiwa pynemkaam da ki tiar wa khian kiwa em wei suk u yoh wei wow yakrehlang wa ki karkhana kiwa da chemphang ha kani ka kaam.
Chooh chooh da ong u wa emkaam wow sdang u pynkrehkaam ya kani ka program ka wow yoh myntoi ki skur, ki thaw puræ, ki yung krehkaam sorkar wa ki yung bru khnang wow ye ki u booh ya ki Solar Rooftop, wow pynemkaam ya i bor ka sngi wei wow pynduna hei pynlut yaka bordiñ.
U M.S. Rao, Additional Chief Secretary to the Government of Meghalaya, uwa pait ya ka kaam bordiñ, da ong u wa kani ka program ye u pynkrehkaam ya ka ha ka jylla deiwa pynchlur yeini wow sdang na ki yung bru, wei deiwa booh thong wa ki bru u bien ki wow pyndait ya ki.
Kiwi kiwa da klam ha kani ka Workshop toh ka R.R. Marak, Joint Secretary, Power Department, kawa da e ki kyntien pdiang burom, u Ajit Pandit, Policy and Regulatory Expert, MNRE-World Bank-SBI Solar Rooftop Program, uwa da batai chaphang ki thong yong ka GRPV.
Hadien ini da em ka esikai hajrong ki aiñ wa ki kyndon krehkaam wei i rukom krehkaam kani ka GRPV.
Discussion about this post