Jowai: Ka seiñ kiwa kreh nurse kawa tip kam ka The Trained Nurses Association of India (TNAI), Meghalaya State Branch ynne ka sngi da pynman ko ya ka XX Biennial State Conference kawa ar sngi ha District Library Auditorium, Mynthong Jowai.
Ka President ka TNAI, Meghalaya State Branch ka Ivory Kharduit hei klam yong ka da ong ko wa kani ka Conference da dep pynman chisien ha Jowai ha u snem 2010 wei ya ka TNAI hapoh ka ri India da seiñ ya ka ha u snem 1922 wei ya ka Meghalaya State Branch da sdang ha u snem 1976.
Da ong ko wa da sdang ya kani ka seiñ yow pait yeiwa emkaam ki nurse wei da tipmit leh ya kani ka seiñ da ka sorkar pyrdi kawa man kam ka seiñ wow e kreh ya ki nurse cha baar ri lada em kiwa kwah u lai.
Heijooh i por da ong ko wa sñiawsih ko wow yoo wa ym em nursing school yong sorkar hapoh ri-loom Jaiñtia wei em leh du kawi kawa pynlai da ka Dr. Norman Tunnel Hospital.
Neiliang u DM&HO ka WJH u Dr. SS Nongbri da ong u wa kiwa kreh Nurse em ki ka yukit ha ki kawa khia bha nadooh ka imlah sahlang neibhah ki kreh ki khlem em i pait chiliang wei da pynchlur u leh wow lai kreh cha baar ri yow yaar i pyrkhat pyrdaiñ.
Ya kani ka Conference da wan wai da u CEM warim ka JHADC u Moonlight Pariat uwa da yaroh yei chakri wa e ki nurse cha ki paidbah, ya ki kynta wa haap yieñ ki dei yieñ bait hadooh wa ym yoh por de wow baam hanlada kattæ leh man ki kiwa phooh dei sooh-rkhai wei e mynsien ki ya kiwa kjut wa daw bha ki.
Da e yaroh u leh ya kani ka seiñ ki nurse kawa man kawa heh dooh yong ki bru wa em ha ki kaam ka chait ka khiah.
Ha kani ka sngi da em leh i pynyoo rong ya ki mar wa da chna na ki tiar wa da dep pynemkaam kam ki kot, ki tymmoh klong wa kiwi kiwi kiwa mih na ki thaw sumaar wei da em leh ka yakob pynyoo rong ya ki syntu.
Da pynkup burom leh ya ka wi ka nurse ka M. Synjon.
Discussion about this post