Shillong: Ka yalang wa chi sngi hajrong ka “Startups and MSMEs in Food Processing” da pynman ya ka ynne ka sngi da ka Associated Chambers of Commerce and Industries of India (ASSOCHAM) hei yakrehlang wa ka Ministry of Food & Processing Industries (MoFPI), Government of India wa ka ICAR Research Centre for NEH Region, Umiam, Meghalaya wa ka SIDBI wow wailad ya kiwa seiñkhih khamtam heiyatoh wa i kaam song baam, ki khynnah puræ, ki warep, ki Self Help Groups, wa kiwi kiwi wow phyllu yumut hajrong ki laad yarap wa ki scheme wa em katni.
Ha kani ka yalang da chimbynta da kamwa 100 ngut heiwa u lat ka jylla, u Tathagata Roy da man u kam u kongsan.
U lat hei klam da ong u waka jylla, Meghalaya em ko chiboon ki mar wa ye wow pynemkaam ha kani ka bynta song baam (Food Processing) neibhah wa man ko ka jylla kawa boon ki warep wei emkaam wow kyntu kynrong ya kani ka kaam khnang wow yoh khih yoh kreh ki khynroo khyllood.
Da ong u wa chirrup wa u khoo, u saru wa kiwi ki mar rep em leh ki soh kam ki khontara, sohjaw, wa kiwi kiwi kiwa ye wow song ya ki ha kiwa boon rukom khamtam i song ya i doh iwa ye bha wow yarap ya ka jylla khamtam lada ye u pynmiat ya i rukom song (Value Addition).
Chooh chooh da pynrap u deiwa ong wa kani ka kaam emkaam bha ko yei yarap khamtam ha kani ka juk kawa katni nadooh ki buit, ki yarap poisa khnang wow ye u pynku ya kani ka khih.
Neiliang u Dr. Narendra Prakash, uwa man kam u Director, ICAR RC for NEH Region da e u ya ki kyntien pdiang burom wei da ong u waka jylla Meghalaya man ko kawa da ku bha ha ki kaam rep wei emkaam wow chim kabu yeini khnang wow ye u seiñ khih lyngba ki mar wa pynmih napoh jylla.
U ML Suiam, OSD, Directorate of Food Processing, Government of Meghalaya da e u ya i klam kyrpang deiwa e khublei ya ka ASSOCHAM wa pynman ko ya kam kani ka yalang. Da pynsñiaw u leh yei eh i khoo wa chem ka chnat yong oo heiwa dang emkaam chiboon ki bynta wow kreh wei da pyntip u leh yeiwa ka chnat yong oo da leh ko wow pynchlur ya ki khynroo khyllood wow seiñ khih ki wei wow yieñ ki ha ki yong ki hi ki kjat.
Da pyntip u leh ya ki Scheme wa e da ka sorkar jylla kamjooh leh da ka sorkar pyrdi wow pynchlur wow sdang u seiñkhih ya ki bru samen.
Neiliang won yong u Chetan Vij, Assistant Director, ASSOCHAM da khana u waka thong yong kani ka yalang toh wow pynche pynsñiawthooh ya ki laad yarap wa yoh na ka MoFPI.
Kiwi kiwa da e klam kynthup ki ya u Dr. G. Kadirvel, Principal Scientist & PI, ABI, ICAR RC for NEH Region, Umiam, u Girinda Brahma, Assistant General Manager, SIDBI; u Dr. Arnab Sen, Head, Division of Animal Health ICAR-RC; u Sajjan Kumar Tharad, Secretary, Frontier Chamber of Commerce and Industry, Meghalaya, ka Sunita Rai Assistant General Manager, APEDA, wa u S K Das, Assistant Director, MSMR-DI.
Discussion about this post