Jowai: Ka Meghalaya Bharat Scouts & Guides, West Jaiñtia Hills da pynman ko yaka 6th Winter Camp 2019 & Youth Leadership Training kawa 5 sngi kawa sdang nadooh ka 12 tarik hadooh ka 16 tarik uni u bnai harood ka wah Mynkjai kawa da wan chimbynta da ki khynnah Scout and Guides na ki kattu katni ki skur yong ka Thadlaskein, Laskein wa Amlarem Block.
Da wan wai ya kani ka Winter Camp da ka Saramai Tariang kawa man leh ka District Commissioner (G) MBSG, WJHD, kam ka kongsan hei emlang leh Ka Chwadaka Laloo ka Ripa Rymbai kam kiwa chah khut sñiawbha, u Adiam-u Bthuh, Jt. District Secretary BS&G, West Jaintia Hills, u Elvis Dkhar, District Organiser (S), West Jaintia Hills ki Scout Master wa Guide Captain yong ki skur waphær.
Ha kani ka Winter Camp da wan wow chimbynta da ki 200 ngut ki khynnah Scouts, Guides wa kynthup ya 55 ngut ki Scouts, 87 ngut ki Guides, 9 ngut ki Rovers, 7 ngut ki Rangers, 5 ngut ki Unit Leader (S), 10 ngut ki Unit Leader(G) wa 2 ngut ki Office Staff.
Ha ki san sngi yong kani ka Winter Camp, ki khynnah Scouts-Guides da chimbynta chongchit ha ki bynta waphær kiwa man hapoh i pait wa pynlai ki Scout Master, Guide Captain, Rovers, Rangers; wei ki rukom sikai kiwa ki khynnah Scouts-Guides da yoh ki na kani ka Winter Camp toh chaphang ki kaam wa yatoh wa ka Scouts-Guides Movement, kiwa kynthup ya ka lehkhooid ya ki soodong sookun ka thaw wa booh ya ki thaw sah namo ka Camp, i tip chaphang kammon wow yarap ya ki para bru hawa em i jia mynsoo wym poi pyrkhat (First Aid), ki rukom chna ya ki thaw booh tiar da iwa pynemkaam da ki siej, i rukom kdoh tylle iwa boon rukom wa tip kam ki Knotting wa Lashing, i rukom pynhær lama, i pynkhreh ya i diñ, chooh chooh da em leh ka yakob chet da iwa pynemkaam da ki tadong siej wa kiwi kiwi.
Chooh Chooh ha kani ka Winter Camp da em leh ka ya laikjat (Trekking), ki yakob wahphær waphær, wei ha ka yurim wow wanrah ya ka mynsien yatylli wa burom kylliang wot hapyrdi i yaphær i ngait niam, da pynman leh yaka All Faith Prayer Meeting kawa man chibynta i por wa kyrpang wa kyntang ha iwa ki khynnah Scouts-Guides da yohlaad ki wow pyndep ya i jar jiar i ngait niam hawa em ki ha kani ka lai Camping.
Hawa klam wa ki bor pynlai ya kani ka Winter Camp da ong wa kani ka Camping man ko chibynta ka laad ka kabu ya ki khynnah Scout-Guide wow yachem ki chisien chisnem da iwa sah ha ki Tent hapyrdi ki loom, ki wah chwa wow kut ki sngi yong u snem hadien wa da kut i por puræ kot wei leh ka thong yong kani ka Winter Camp toh wow e sikai wow seiñdur ya ki khynnah Scouts-Guides kammon wow man ki ki bru kiwa ye u chaniah u im ki ha ka luti wa toh yow man ki kam ki nongmuna wa bha ya kiwi ki para chnong.
Discussion about this post