Jowai: Chibynta wow kyntu kynrong wei wow pynneh pynsah yaka riti dustur yong i rukom chaad, rukom rwai, rukom ak wa kiwi kiwi wa jooh leh hajrong ryngsan heiyatoh wei rukom leh Drama (Theatre), ynne ka sngi da wai paidbah yaka e sikai neibynta ki khynnah wa hapoh 18 snem i rta ha Mynthong District Library watip kam ka “Children Theatre Workshop”.
Ya kani ka e sikai da pynman daka Sangeet Natak Akademi North East Centre chirup i krehlang ka Department of Art & Culture ka sorkar jylla wei u kut ko hadooh ka 16 tarik u bnai Thohlakhmi (February).
U Arup Bordoloi Project Director, SNA-NE Centre khana u wa i e chakri yong ka Sangeet Natak Akademi North East Centre, da sdang ko nadooh u snem 2008 hajrong ka yurim wow kyntu yei sap ak Drama (Theatre) haki thaaiñ Northeast.
Wei kamwa ka Drama (Theatre) toh kawi naka sap pynyoo ryngsan wa kongsan tam, kamtæ neipor chei por jooh pynman ki kam kani ka e sikai haki thaw waphær waphær ka thaaiñ Northeast.
Kamtæ ha kani ka Workshop wada pynman ha Jowai leh yoo luti u wa hadooh kamwa 40-50 ngut ki khynnah u wan chimbynta ki.
U Dolloi ka Elaka Jowai u Puramon Kynjiñ hawa klam kam u kongsan ong u, “Ha Jowai leh ya kam ini i thmu i angnood wow pynneh pynsah yaka riti dustur dang pteiñ ki hadooh kini ki sngi, nachwa jooh khut Theatre neibhah wa nadooh kiwa rwai wa tem wa kiwa ak da leh bait ha rynsan hi, tangwa ha kini ki sngi won da khut Drama neibhah wa katkam i kylla ka por hanla ha kajooh hi ka rynsan pynemkaam leh, tangwa wym em de ki watem kiwa man katam ka riti dustur neibhah da chim noh da ka rukom leh ki bru sepsngi næ Western Style”.
Kamtæ kyrmen u wa kani ka Workshop u pynmyntoi ko yaki khynnah wa wan chimbynta wei kyntu leh yaki wow man kiwa pynlai yumut.
Kiwi won wa e i klam kynthup ka Banalari Lyngkor Assistant Curator, u Wanphrang Hayong Gassah In-charge Librarian Jowai wa kiwi.
Discussion about this post