Hadien wa kut ka 14 sngi i e por yong ka East Jaiñtia National Council (EJNC)-Central Executive Council, yaka yung krehkaam yong u Deputy Commissioner ka East Jaiñtia Hills District wow thung noh daka Magistrial Enquiry hajrong i yoh mooyong ki karkhana Coke Factory kiwa em hapoh ka District wot hapyrdi i khang yong ka NGT wow challan wei tih mooyong hapoh ka jylla nadooh u snem 2014.
Ynne ka sngi, kam chibynta wow booddien ya itai i dawa yong ka seiñ, neiliang yong ka EJNC-CEC hapoh i yalam yong u Sambormi Lyngdoh, President Rangbah ka seiñ da lai wow yachem ya u E. Kharmalki, DC yow tip iyi wa da leh hajrong kani ka phang.
Hawa yaklam wa u DC, da pyntip u wa neiliang ka miej yong oo da thung yaki District Magistrate wow leh yaka takit wei wow sylli leh yaki kot ki sla wei ini dang bampor sa 4 sngi wow yoh yaka Report yong katai ka Magisterial Enquiry.
Ka EJNC kwah ko wow pynche cha kiwa chong chnong yong ka East Jaiñtia Hills wa i em ki Coke Factory hapoh ka District ym wanrah ko ya i roi i paar næ i yoh nong ki paidbah kiwa chah ktah, tangwa i boon ki Coke Factory daw wanrah myntoi ko du ya ki kattu katni ki bru samen tangwa ktah won ko ya waroh.
Ka seiñ da ong ko wa i tdem wa mih na kini ki karkhana ym toh de du i tdem tangwa man ko i pum pum mooyong wei ini daw ktah ko ya i chait i khiah, ka umbaam umdih wa ki thaw rep thaw riang, wei waroh kini ki Coke Factory ym em bood ryntih ki yaka kyndon krehkaam kamjooh yaka aiñ Environmental (Protection) Act 1986.
Kamtæ neiliang ka EJNC daw booddien ko ya ini waroh wei lada i kaam dawa i, ka seiñ daw pynman ko leh da ki yakhih paidbah hapoh ka District.
