Deilang wa waroh kawi ka ri, ki bor District ka West Jaiñtia Hills da lehkmen ki yaka 11th National Voters’ Day wa pynman ynne ka sngi ha District Library Auditorium, Mynthong ha Jowai hajrong ka phang, ‘Making our Voters Empowered, Vigilant, Safe and Informed’ heiwa da emlang u Deputy Commissioner, u Garod LSN Dykes, u PK Boro, ADC, u L. Kynjing, ADC, ka D.D. Syngai, ADC, ka Y. Mawlong, EAC wa u M.A. Challam, EAC.
Da em leh u O. Lamin, MDC JHADC, u L. Lakiang, Waheh Chnong ka Lathadlaboh, ki khynnah skur, ki wakreh ka chnat Election, u Ferdinand Suchiang kam uwa chah khut sñiawbha katwa yaka yalang da pynlai da u L. Kynjing.
U Deputy Commissioner hawa e yei klam da yaroh u yei kreh chitom ki BLO, ki sahep wa ki wakreh ka chnat Election wow chon ha kiwa dang khynroo wow pynemkaam yei hok yong ki. Da pynchlur u leh ya kiwa da dap rta wow wan thap pyrtuid ki kam kiwa thap Vote kamjooh yow wan chakhmat yow pyndam noh yei pyrtuid kiwa da khlaad noh.
Ha chwa ini, ka D.D Syngai, Additional Deputy Commissioner hawa e ya i klam wai phang da ong ko wa i thong kani ka sngi toh yow pynchlur ya waroh kiwa da em hok wow thap Vote yow pynsñiawthooh yaki yei emkaam wow chimbynta hei jied ya kiwa mihkhmat paidbah. Hadien ini, u P.K. Boro da yahkhmat u yei puræ yaka smai.
Da saam leh yaki Electoral Photo Identity Card (EPIC) cha ki 30 ngut kiwa man kam kiwa thap Vote wa thymme. Da e khusnaam leh cha ki arngut kam ki Best Booth Level Officers kitæ u First Joy Lamare naka 46-Saphai Pohrtiang-A Polling Station hapoh ka 4-Mowkaiaw AC wa ka Anita Dkhar kawa naka 34-Nartiang-A Polling Station hapoh ka 1-Nartiang AC yei bynta yong ki wow pynbait pynryntih yaka Election.
Ha ki sngi chwa, da dep leh wow pynman daka yung krehkaam u Deputy Commissioner Election Branch yaki yakob Quiz wa Debate haka 20 tarik uni u bnai hajrong ki phang synchaar paidbah kawa da pynman neibynta ka Debate kawa ong ‘Democracy is the best form of Government’ katwa yaka Quiz won da pynman hajrong i pynman Election, ki Election ha Meghalaya wa ki kaam wa yatoh wa jia i man ha kini ki sngi.
