Jowai: Kamwa jooh leh chisien chisnem, ka Procession Eucharist ka Parish Ummulong, ha uni u snem da pynman ha kani ka 16 tarik, heiwa da ki hajar ngut ki para wa ngait na ki Parish wa marjan ka Jowai Diocese, Archdiocese Shillong wa na ka Diocese Nongstoin da wan chimbynta chongchit ki cha kani ka Procession Eucharist yong ka Parish Ummulong.
Ha chwa wow pynman ya ka knia Mass Eucharist wa khooid, da yoh ya i klam pdiang sñiawbha ya waroh kiwa wan chimbynta cha kani ka Procession da u Phadar Policarpus Shylla, Parish Priest yong ka Parish Ummulong.
Ha i por 10 waje i step da pynman ya i knia Mass Eucharist wa khooid wa yahkhmat da u Phadar Hilarius Lamare, Parish Priest ka Parish Jowai uwa man leh u Vicar General ka Jowai Diocese hei synran lang ki Phadar kiwa da wan chimbynta cha kani ka Procession. Ka lehniam man ko kawa chongkun chongblai heiwa ki Phadar da ku ki cha ka duwan knia kawa da yahkhmat da kiwa chaad tynre da ki khon khyllood ka Balang chnong Ummulong wa da i rwai wa sñiawbang sñiawthiang da ka Choir kawa yahap sur wa i chaad.
U Phadar Hilarius Lamare, u kongsan ha kani ka sngi ha i sneiñ i kroo ya ki para wa ngait da ong u wa u Blai da e u ha i ya i mon wa laitlooid wei chong ko ha i wow jied ya iwa bha næ iwa sih, wei lada jied i iwa bha, itæ da man i ki bru kiwa ksoh hukum, i kamai i ya ka hok ka sot wei tei ya i long i man wa bha pyn ya i, ya ka yung ka sem, ya ka imlang ka sahlang, ha ka kur ka jait, ha chnong ha thaw, ya ka Balang wa ya ka jaitbru hi waroh kawi. Tangwa lada jied i ya iwa sih daw pynsih ko ya waroh ini iwa bha.
Discussion about this post