Da pynman yaka pynsñiawthooh paidbah hajrong ka HIV/AIDS ha chnong Moolang

Ynne ka sngi, ka yung krehkaam yong ka Chankylliang Development Society (CKDS) hapoh ka Link Worker Scheme Khliehriat lyngba i kyrchaan naka Meghalaya AIDS Control Society, chirup deiwa krehlang wa u Secretary, u Waheh Chnong yong ka Moolang, East Jaiñtia Hills da yoh ki u pynman ya ka Village Level Awareness Camp (VLAC) neibynta ki paaid chong chnong heiyatoh wow yada na u khñiang HIV/AIDS.

Ha ka yalang wada pynman ha madan pynthor kba wa pynlai da u Rimiki Lathong, da emlang leh u Waheh Chnong ka Moolang uwa da pdiang sñiawbha ryngkat wa u District Resource Person (DRP) ka Link Worker Scheme, u Kynsaibor Kharkongor kamjooh leh ka Rinibeth Patlong (PM, TI Khliehriat) kam ka bru chemphang (Resource Person) kawa e yei klam heiyatoh wa kammon wow yada wei pyndooh jait ya u khñiang HIV/AIDS. Da yoh leh yei klam heiyatoh i yumut yong u Red Ribbon uwa man ka chap yong ka HIV/AIDS da u Zonal Supervisor, u Dauni Wanemi Sutnga.  

Ka Rinibeth Patlong da batai ko chaphang i maa lada u lane ka bru wa em ya u khñiang HIV ym leh smat ki yei Test heipor wa biang neibhah wa ye u chah ktah i doh i pran khlem da dih dawai smat wei kamjooh leh yow lait nei pynpoor ya u khñiang cha kiwi lada ym biang i sumaar wei yada.

Da kyntu ko leh ya ki khynroo khyllood wow man ki kiwa chlur wow wan chakhmat khamtam wow phah Test khnang wow tip yei sakhiat lada u næ ka bru em ki næ ym em ki ya u khñiang wei ka Test leh man ko kawa dei mynkna wa e da ka sorkar.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha ka yalang da wanrah leh ya ka kari Mobile ICTC (Integrated Counselling &Testing Center) na Civil Hospital, Ialong wow yarap pynleh Test ya kiwa chong chnong ka Moolang khnang yow tip yei man ki lada toh kiwa yoh ya u khñiang HIV, wei da em leh ki kattu katni ngut kiwa chong chnong kiwa wan chakhmat wow leh ya ka Test wei daman ko leh kam ka dak wa bha.

Hawa pynwai ya ka yalang, da e ya ki kyntien khublei da ka Zonal Supervisor, ka Haphadahun Simpli kwa da e khublei ya waroh kiwa chong chnong ka Moolang kamjooh leh ya kiwa e kyrchaan kiwa da wan pynlait por khnang neibynta i jop kani ka pynsñiawthooh paidbah.