Jowai: Kam chibynta wow kynmoo yaka World Mental Health Day hajrong ka phang “Mental Health Promotion and Sucide Prevention”, ka chnat yong ka chait ka khiah ka West Jaiñtia Hills District lyngba ka District Mental Health Programme, Jowai Civil Hospital Ialong, ynne ka sngi da pynman ki yaka pynsñiawthooh yaki khynnah skur waphær waphær hajrong wa kammon wow yada na i chitom i bor pyrkhat pyrdaiñ wow yada na i pynkut yabor ya i mynsien haka yalang wa pynman ha Khimusniang Community Hall.
U Superintendent of Police WJH, u Lakador Syiem da kyntu u wow pynman yaka laitlooid yaka bor pyrkhat pyrdaiñ, neibhah lada chait i bor pyrkhat daw ye i wow pynjanai wow pynlai bha ya ki kaam ki jaam kamjooh wot haka puræ puthi, nalor wow man kiwa sñiawthooh kammon wow e yarap ya kiwi kiwa chah ktah.
Ha i jooh i por kam u khlieh ka chnat pulit hapoh ka District, da pyntip u wa em ki bru wa yoh ya kam ini i chitom kiwa wanrah yaka kulmar haka imlang sahlang, tangwa hawa lai i cha ki toh u sñiawthooh wow lai da i dur kam kiwa yarap ki wym toh wow kheiñ ya ki kam kiwa beij wei du kiwa chah ktah ha i bor pyrkhat.
Ka R.S. Manner, Additional Deputy Commissioner ka WJHD da kyntu ko yaki khynnah skur wym toh u e laad ya ki jait pyrkhat kiwa ktah kiwa pynthut yei bor pyrkhat, wei wow man leh kiwa minot ha ka puræ puthi yow yoh yaka mynried kawa tyrchaaiñ.
Lada maad kawon kawon ka sñiawsih næ i eh, toh u pynsñiaw haki paralok, kiwa ha yung ym toh wow kun hei yong samen kawa daw kylla kjut kawa ye u yah bakla hei im.
Ha kani ka sngi ki bru chemphang wa da e yei batai bniah hajrong ka phang kani ka sngi toh ka Dr. A.M. Paswet Psychiatrist, District Nodal Officer DMHP, ka S. Syngkon Clinical Psychologist DMHP haka yalang wa pynlai da u Dr. E. Dann Programme Officer DMHP.
Nalor ki pynche da em leh i pynyoo ya ki khynnah kammon wow e yei kyrchaan ya kiwa sñiawsih kawa da chimbynta daki khynnah skur, kamjooh hei step da pynman yaka Rally kawa sdang nadooh Soomer hadooh Khimusniang kawa da chimbynta da kiwa yah thuk thuk wa ki Bicycle.
Discussion about this post