Ka Dorbar Chnong Chiliangraij, Jowai ynnin i janmiet ka 4 tarik da pynman ko yaka e sikai heiwa kammon wow pynyakhlaad yei jhep pyn na yung namo ka ‘Awareness Programme on Segregation of Waste at Source’ ha Yungwalieh ka Dorbar Chnong.
Ya kani ka e sikai da pynman hei yakrehlang ka Seiñ Kynjei waka SURE heiwa u Franky Laloo, u Environment Engineer na ka MSPCB wa u Dr. HH Mohrmen na ka SURE da man ki kam ki bru chemphang ha kani ka janmiet.
U Franky Laloo da batai u hajrong ka aiñ Waste Management Rules 2016 katwa u Dr. Mohrmen da batai u kammon wow pynkylla sboh wei pynkylla baam sñiang ya ki mar-baam wa pynmih na ki yung ki sem.
Ha kani ka janmiet ya ka yalang e sikai, da pynlai da u General Secretary ka Chiliangraij, u Oriland Shylla heiwa u Waheh Chnong, u DH Pde da khana u yeiwa chem chitom ki manyung ha ki bnai wa dadep heiyatoh wa i jhep ha Jowai.
Hadien wa kut ka e sikai da saam leh ya ki thaw nohjhep kiwa em jar jiar ki rong wow pynkhlaad ya i jhep hapyrdi kiwa py’ut wa ki wym py’ut.
Na kani ka e sikai da yoh myntoi palat chispah tylli ki manyung ka Chiliangraij.
