Shillong: Ka chnat i chait i khiah yong ka jylla ynne ka sngi da chem ko wa da em 13 ngut kiwa ye bha u chah ktah (High Risk) na Ri-Bhoi District wa na East Khasi Hills kiwa em 16 ngut kiwa ye u chah ktah næ em i maa, katwa ki wym em ware ha i maa da em ki 20 ngut ha Ri-Bhoi wa 2 ngut ha East Khasi Hills. Ya ini da pyntip da u DHS (MI), u Dr. Aman War ynne i janmiet, deiwa pynrap leh wa ya ki nongmuna (Sample) yong kini waroh da dep chim wei yaka Report ye u yoh mynstep ka sngi.
Hawa klam wa ki laad pathai khubor u DHS da kyntait u wa ini poor yong u khniang COVID-19 cha ki chnong, tangwa neiliang ka chnat i chait i khiah da yaklam ki leh wa montri rangbah wa ya u waheh chnong wow pynhaap yaka Umsamlem hapoh ka Containment Zone.
Da pyntip u leh wa kattæ ya uwa yoh COVID-19 da em bait hapoh Isolation Ward ha Dr. H Gordon Robert Hospital wei man u uwa khlan, da ong u leh wa ki wakreh wa pait wa sumaar ya utai u bru ym yakhleh de ki wa kiwa sumaar ya kiwi ki kjut.
U Dr. War da pyntip u leh wa ka chnat i chait i khiah da tipmit ko leh yaka Robert Hospital kam ka thaw sumaar ya kiwa yoh COVID-19, deiwa pyntip leh wa ya utai u bru da rah cha kani ka Hospital nadooh ka 7 tarik uni u bnai neidaw wa em u yei iñdoh wei kyoh wei da booh bait ha i thaw wa da pynkhreh neibynta kitu kiwa suba chah ktah ha u COVID-19.
Ha i jooh i por, u Dr. War da pyntip u wa ynne i janmiet da em sa 3 ngut kiwa liwan na baar jylla kiwa da Test Positive COVID-19 wei waroh toh ki chynrang wa kynthup 1 na Tura, 1 na Shillong 1 na Jowai.
