Jowai: Yow pynsñiawthooh yaki paaid warep hei yatoh wa i rukom e sboh yaki jhoor wa kiwi ki jait wa thung lyngba i sboh rymaw khnang yow ye u yoh myntoi, ynnin ka sngi u Union Minister ka chnat Agriculture u Narendro Singh Tomar da wai paidbah u yaka Fertilizer Application ha New Delhi, wei ha kani kajooh ka sngi da wai leh ha ri-loom Jaiñtia ya kani ka jooh haka yalang wada pynman da ka Krishi Vigyan kendra, Jaiñtia Hills ha Samanlang Socio Cultural Pastoral Centre Jowai Diocese.
Da ong wa kani ka Fertilizer Application toh kawa emkaam bha ya ki warep u tip ki, neibhah boon ki warep du neidaw wym tip ki wow e yukheiñ yudiah yaki sboh hawa rep wa riang ktah noh ko yaka khyndaw wei wym ye de u yoh yaki yuthung wa bha.
Nalor ini ktah haroh ko yei yoh nong ki neibhah chwa ini hap haroh ki wow pyllut ka poisa neibynta u thied yaki sboh tangwa du neidaw wym em i tip i stat te ktah noh ko yei yoh i kot.
Kamtæ kiwa e yei klam ha kani ka sngi nadooh u Dr. D. Paswet, Senior Scientist & Head KVK Jaiñtia Hills, u Sanjoy Sahana, Marketing Manager ka T. Stanes & Company Ltd, ka L. Lakiang Project Director, ATMA, West Jaiñtia Hills, Fr. Manbha Pakem, Director Jaiñtia Hills Development Society, Lumbihsyntu wa kiwi, nalor u Brightstar Chyrmang, MDC ka Jowai North uwa man kam u kongsan, yooluti ki wa lyngba kam ini i chah sikai ki paidbah daw sñiawthooh ki hei yatoh wa kammon u pynemkaam yaki sboh wei kiwa kammon ki jait sboh wa yahap wa kiwa kammon ki jait yuthung, kamjooh leh wa heiwon i por u pynemkaam yaki.
Ha kani ka sngi ki warep da yoh haroh ki i batai bniah naki bru chemphang wa kynthup ka R. Lyngdoh SMS (Agronomy), KVK Jaiñtia Hills kawa da klam hajrong ka phang Integrated Nutrient Management, u Remedy Lamare, Scientific Officer DLRS&L, West Jaiñtia Hills da klam u hajrong ka Principles & Method of Fertilizer Application wa ka Banylla Kharbamon, SMS (Horticulture) KVK Jaiñtia Hills da klam ko hajrong ka phang Promotion of Community Owned Farm Involving Agriculture & Horticulture Crops.
Discussion about this post