Ka National Deworming Day (NDD), 2023 da kynmoo ya ka ynnin ka 17 tarik ha Khliehriat Higher Secondary School, East Jaiñtia Hills District ha ka yalang wa pynman da ka yung krehkaam u District Medical and Health Officer, East Jaiñtia Hills District hajrong ka thong wow e dawai wieh ya waroh ki khynnah kiwa em nadooh chi snem hadooh 19 snem i rta ha ki skur kamjooh ha ki Anganwadi Centre.
Neiliang ka Dr. N.P. Suchiang, DIO, I/C East Jaintia Hills District, Khliehriat da pyntip ko cha ki khynnah skur wa em ha kani ka yalang wa ya kani ka National Deworming Day (NDD) da sdang da ka Ministry of Health and Family Welfare ka sorkar India ha u snem 2015 wei da pynman ya ka arsien chi snem kitæ ha u Naitung (Apr) wa ha u Naichiphaw (Oct) yow pyntikna wa waroh ki khynnah ha India ym em wieh ki.
Da batai ko leh kammon psiah ki wieh chapoh kpoh u bru wei kiyi ki dak ki chin wa i jiat chitom wa yoh deiwa em ki wieh wei kammon wow yada na ini deiwa man kiwa leh khooid khamtam ya ki kti wei hawa baam wa dih.
“I dawi kuli Albendazole toh iwa miat bha u pynemkaam iwa ye wow tylliat, lane kjap bait wei dep te dih sa ka um”, da ong ka Doctor deiwa sneiñ leh ya ki khynnah wow dih ya ini i dawa neibhah toh iwa yarap.
Chooh chooh da pyntip ko wa daw pteiñ ya kani ka National Deworming Day (NDD) ha ka 21 tarik yow pyndih dawai ya kitu ki wym pu em ya ini i dawi ha ka 17 tarik.
Kiwi de kiwa klam toh u Ariston Dhar, District Programme Manager, NHM, East Jaiñtia Hills District, wa ka Dr. I. Dkhar, RBSK, AYUSH Medical Officer.
