Ka Society for Urban & Rural Empowerment (SURE) West Jaiñtia Hills District ynne ka sngi Khyllaw 12 tarik Wisu da pynman ko ya ka Village Level Awareness Camps on HIV/AIDS Cum Voluntary Blood Donation Camp ha CHC Ummulong wei da em byntalang leh da ka Jowai Civil Hospital Blood Donation Centre waka Meghalaya Aids Control Society (MACS).
Ha ka yalang yahkhmat yong kani ka yalang pynsñiawthooh paidbah hei pynlai ka Coriniki Slong da yoh ki kyntien pdiang burom na ka Niwanki Shylla neitae i klam wa tbian heiyatoh wa ka thong yong kani ka sngi da pynsñiaw da ka Darimika Lywait kamjooh leh ki kyntien e mynsien ya kiwa yachimbynta na u Dr. H.H. Mohrmen, President SURE, West Jaiñtia Hills katwa u Deibor Dhar hawakut da e u ki kyntien khublei.
ka Sunita Suna yong ka MACSWA kam kawi na ki bru stat bru chemphang chaphang ka kjut HIV/AIDS da khut kysru kyntu ko ya ki paidbah wym toh u kulmar yumut pyrkhat chaphang kani ka kjut neibhah ha kini ki sngi ki por wa katni lada ki bru wa yoh yeini i kjut chimkhia ki wow dih dawai tikna wei u bood ryntih ya ki rukom watoh u leh ye ki u yoh yei chait i khiah ki wow man leh ka laad yada nei yohlaad kani ka kjut u poor u paar cha kiwi.
Heiyatoh wan wa ka Blood Donation Camp, ka Dr. P.Shylla, Medical & Health Officer, In-charge Jowai Civil Hospital Blood Bank Centre, e ko i sñiawngooh wa khroo ya ka SURE wei ong ko leh, i ye u pynman ya ki Blood Donation Camp na ki por cha ki por da ki seiñ wa ki chnong, ki dong waphær man ki kam ka umchangpet wow kyrchaan yei krehkaam yong ka Blood Bank Centre kamtæ ka Voluntary Blood Donation Camp toh kawa emkaam hadooh kattæ neibynta wow ye ka Blood Bank u chakri u yarap ya ki para bru ha kiwon kiwon ki por.
Chooh chooh ka Dr. P. Shylla e ko leh i klam i batai wa bniah chaphang i rukom e snam wa kiwi ki bynta watoh u leh u bood kam ki paidbah hawa ya chimbynta ha ki Blood Donation Camp.
