Kam chibynta u pynyoo yow man kam ka nongmuna hajrong i emkaam i khooid i jngiar. Ynne i step neiliang ka District Legal Services Authority, East Jaiñtia Hills chirup i yakrehlang waka Khliehriat Bar Association, ka Jaiñtia Eastern College, ka St. Anthony’s Extension Byndihati, ka Ambrose Memorial School, ka Khliehriat Higher Secondary School, ki bor pulit wa kiwi da chimbynta ki hei pynkhooid yonglang yaka Iaw Pyngkat wa em ha Khliehriat West.
Chwa u sdang yei pynkhooid da em chwa ka yalang tbian ha pchem ka Community Hall Khliehriat West wa pynlai da u K. Ksoo President ka Khliehriat Bar Association.
Ha kani ka yalang tbian kiwa yalam da pynsñiaw ki hajrong i emkaam i khooid i jngiar haka imlang sahlang, khamtam heiyatoh wa i chait i khiah.
Ka G. Rani, District Session Judge Khliehriat hawa e yei klam kyntu ko wow pynku yei sñiaw yong idæ heiyatoh wa ka imlang sahlang, wym toh wow noh taroi yei jhep kat chawa yoh. Nyngkong hi toh u sdang yei lehkhooid na yung, na skur heiwa u noh yaki jhep ha ki thaw wa da booh.
Neiliang u Dr. P. Nongtdu, Principal Jaiñtia Eastern College, ong u wa i lehkhoid toh iwa emkaam nadooh i yung wa sah, i baam i dih, i doh i pran wa i soodong sookun, da e nongmuna haroh u yei rukom man ki bru haki por nachwa wa ki por katni heiyatoh wa i khood i jngiar.
Kamtæ neiliang u Secretary ka DLSA u D.S. Marbaniang, CJM yooluti u wa kani ka sngi u man ko ka nongmuna ya kiwi tawan wa ym hoi u leh taroi u noh taroi yaki jhep kat chawa yoh kamjooh leh haki yaw ki haat.
Kiwi won wa e yei klam kynthup ya u waheh chnong ka Khliehriat West, u Secretary ka Khliehriat Bar Association u R. War uwa da e yei kyntien khublei.
