Ynnin ka 2 tarik u Wisu da pynman ya ka pynsñiawthooh paidbah wa ka esikai “Awareness cum Training Programme” hajrong i chong kurim dang khynnah (Child Marriage/Early Marriage/Teenage Pregnancy).
Ya ka yalang da pynlai da ka Iasakhilang Village Organisation, Tuber Shohshrieh, kawa yoh yarap na ka “Chief Minister Youth Development Scheme”.
Neibynta i thong yong kani ka Programme da khut ya ka Heiniwa Sumer (Protection Officer IC) yong ka District Child Protection Unit, Khliehriat, kawa da pynche wa ki khynnah kiwi em 14 hadooh 16 snem i rta chaphang i “Hok yong ki khynnah (Child’s Right), ka aiñ Protection of Children from Sexual Offences (POCSO Act 2012), Child Marriage/Early Marriage wa kammon ktah ka chong kurim heipor wa dang khian.
Da ong ko leh i yoh kurim dang khynnah ktah ko yei doh yei phaad, i yoh i dooh lada wym biang ka poisa poi laiñ, ktah ko yei suk i pyrkhat pyrdaiñ, ong haroh ko wa deiwa boon kurim ye u yoh leh ya i kjut HIV/AIDS. Wei neidaw wa smat u yoh kurim, boonsien da pynman ko wow pep skur ki khynnah.
Da pynkut ko deiwa ong wa ka purae puthi man ko kawa emkaam bha hadooh kattæ wei toh u booh ya ka hakhmat dooh.
