Ka Nehru Yuva Kendra Sangathan deilang waka Dong Lummajar Club Nartiang haka 28-02-22 da pynman ki ya ka yalang hajrong ka Jal Jagran Abhiyan namo kammon wow pynneh pynsah wei wow pynlang um hajrong ka phang “I pynmiat pynbha ya ki tyllong um” ha Community Hall Nartiang. Heiwa ya ka yalang da pynlai da u Nidaioh Myria, Chairman yong ka Dong Lummajar wei da yoh yei klam na kiwa boon nadooh u Yiang Maskut, Secretary Dong Lummajar Club Nartiang uwa da pdiang burom wei da batai tbian u hajrong k Jal Jagran Abhiyan (JJA).
U M. Phalangki, Waheh Chnong ka Nartiang u da kyntu ya kiwa chong chnong wei da e khublei u leh ya ka Dong Lummajar wa da pynman ko ya kani ka jait yalang neibynta wow pynsñiawthooh ya kiwa chong chnong kammon wow pynemkaam yaka um man-ka-sngi khamtam ha kini ki sngi wa katni wym toh u pynsepai ya ka um wa da e da ka bei rymaw nadooh ki thlu um kiwa da booh da ki longchwa manchwa.
Ka Deirisa Sutnga, NYKS Jowai da pynche ko chaphang ka Jal Jagran Abhiyan (JJA) hajrong ka phang Important of Water Resources Development deiwa pynchlur ya kiwa chong chnong ka chnong Nartiang wa kani toh ka kabu ksiar heiwa da pynsñiawthooh ko leh kammon wow pynlang um-slap.
Neiliang u Danial Marbaniang naka chnat PHE da batai pynche chooh chooh u chaphang ka Water Harvesting namo wow pynlang um kamjooh ki um wa mih na ki tyllong um yow yoh u pynemkaam hawa duna slap. Kamjooh leh yow yoh u e um jhoor.
Ya ki um wa tooid cha baar ye wow pynlang ha ki thlu wa da tih da siang da i khyndaw-bilat kamjooh da khana u leh kammon wow pynkhooid ya ka um slap na i jakhlia yow man ko kawa khooid deiwa pynemkaam da u chyiap wa ki mooria yow ksoh ki ya i jakhlia wei deiwa pynemkaam leh ya ki Sponge Filter.
U B. Shylla, Astt. Engineer Water Resources Department, West Jaiñtia Hills District da khana u kammon wow pynlang um-slap ha ki yung ki sem wei kammon wow pynkai cha ki thaw rep.
Neiliang u Dawan Lyngdoh, MDC uwa man kam u kongsan ha kani ka sngi da e khublei u ya ka NYKS wa da pynman ko ya kani ka yalang khnang wow pynsñiawthooh ya ki bru kammon wow pynlang um wei wow kheiñkor ya ka kawa da e sñiawbha da ka rymaw wei yow yoh leh yei chait i khiah wei da kyntu u leh ya kiwa chong chnong wow ya krehkaam lang ki ka waka sorkar manda pynkrehkaam ya Scheme JJM ka wow pynpoi umkor cha ki yung ki bru wa da mang daka sorkar khnang wow man ko kawa yoh nong ya kiwa chong chnong.
