Ka Gender Campaign namo i pynsñiawthooh yei man salonsar hapyrdi ki chynrang wa ki kynthai da pynman da ka BMMU Amlarem, West Jaiñtia Hills District ynnin ka 16 tarik.
Ha kani ka Campaign da emlang u Dr. D. Lyngdoh, BDO Amlarem, u B.C. Marak, Officer In-Charge ka Amlarem Police Station, u R. Shadap, DMM MSRLS, kiwa kreh ka BMMU wa kamwa 250 ngut ki dkhot ki Self Help Group ka NAMRHENDIMIAT CLF.
Ha kani ka sngi da pynman ya ar tylli ki Street Play hajrong ka phang “Ending Gender Based Violence” da ki dkhot ka SHG na ka Liarhenbit VO na chnong Nonglamin Thymme wa ka Kyrmenlang VO ka chnong Jaraiñ ha yaaw Amlarem yeiwa da pynbood ya i chim ya ki kyntien kular.
Da pynman leh ya i lai paidbah na yaaw Amlarem chadooh cha yung krehkaam Amlarem Block heiwa da pynkut ya ka sngi da ka pynsñiawthooh heiyatoh wa ki aiñ namo Legal Awareness hajrong i hok yong ki kynthai wei kammon u yada ya ki wei ya ini da batai da u B.C. Marak.
