Ka KSU Wapung Unit da pynman ko yei thang mombati ynne ka sngi heipor 5 waje i janmiet ha pchem ka Wapungskur Higher Secondary School kam i dak wow pynyoo yei sñiawsih wei sñiawlem ya ka yung ka sem yeiwa chah tynyap ka Ebamon Siangshai kawa puræ Class X ha kani ka skur kawa naka chnong Pamrakmai.
Ha ini i thang mombati da emlang ki khynnah skur yong ka Wapungskur Higher Secondary School wa ka Krant Bell Secondary School.
Da yoh yei klam na u President ka Wapung Unit u D. Lyngdoh, na ka Principal yong ka Wapungskur Higher Secondary School wa na u Principal yong ka Krant Bell Secondary School.
Da yoh leh yei klam na uwi uwa sikai yong ka skur Tia Chaphrang Higher Secondary skur u R. Siangshai, kamjooh leh da yoh yei klam na uwa e buit ka KSU Wapung Unit u D. L. Rymbai.
Da emlang leh ki dkhot seiñbhalang yong ka MPUF, AJYWO wa JSM.
Ka KSU Wapung Unit da dawa ko na ki bor sorkar wa ki bor wa haneiñ wow thooh wow kdong ya kiwa emkti wei wow pynchitom ya ki katkam ka aiñ.
Kamjooh leh da dawa na ka sorkar wa toh u leh ko iyi re iyi yow em i chong chngaaiñ ki kynthai khynnah wei toh wow booh leh yei sikai wow yada ya idæ (Self Defense) ha ki skur næ College wa em ha sor næ nongkyndong.
