U Publicity Secretary ka Jaiñtia Hills Truck Owners Association (JHTOA), u Nehemayah Tyngkan ynne ka sngi da pyntip u wa ka seiñ da rai ko wow pynsangeh chwa ya i yakhih (Strike) yong ka heiyatoh wa ki mat dawa ka seiñ na ki karkhana khyndawbilat.
Ya ini i rai da chim hadien wa ka seiñ ki karkhana khyndawbilat kawa tip kam ka All Jaiñtia Cement Manufactures Association (AJCMA) da khut yaklam ki ya ki heh ka JHTOA ha ka 25 tarik uni u bnai ha Thomas Nongtdu Complex ha Byndihati, East Jaiñtia Hills District.
Neiliang ka JHTOA da kyrpaad ko ya ki Executive Member yong ka wow yawan khnang cha kani ka yalang wow yaklam hajrong ki mat dawa ka seiñ.
Kam wow pynkynmoo heini ka JHTOA da dawa ko na ki karkhana khyndaw-bilat wow pynneh ya ka bai kit mar ki truck, wow sangeh i thied truck ki karkhana, wow dam u kyrriah ya ki kudam (Godown) ki karkhana na Meghalaya cha Assam wa kiwi kiwi.
