I thooh ya ki bru wa sahkut hapoh ka Krem U-le kawa em ha Umpleng, Sutnga, East Jaiñtia Hills da pynsangeh noh chipor nadooh ka 7 tarik uni u bnai neidaw joor u slap wei wa ku ka um hapoh ka krem, iwa da pynman ya ki chipai Navy, NDRF wa SDRF wow chem chitom ki wow thooh sa ya arngut kiwa dan sah kiwa kreh kam kiwa mylla tih mooyong. Katkam ka khubor wa da yoh lum, ki chipai Navy da mih noh ki na East Jaiñtia Hills deilang wa ki tiar ngam um ynnin ka sngi.
Hawa yaklam wa u Montri ka chnat Revenue & Disaster Management ka jylla, u Kyrmen Shylla da pyntip u wa da yoh yutip na u Deputy Commissioner ka East Jaiñtia Hills wa i thooh ya ki 2 ngut kiwa dang sahkut da hap wow pynsangeh noh chwa kattæ waroh chi tayaw neidaw wa joor u slap wei wa ku ka um ha katai ka krem.
Da pyntip u wa ka um hapoh katai ka krem da em ko kamwa 150 phut, wei hadien wa da taan (Pump) ya ka um cha ka 118 phut, da yoh wow sai ya ki le tylli ki metyap, tangwa hadien itæ ka um katni da ku ko cha ka 200 phut, wei wot ki chipai ka Navy leh da pynsñiaw ki wa ym man chngaaiñ ki wow ngam ha katai ka krem.
Katkam wa pyntip u Kyrmen, i pynlut yong ka sorkar hadooh katni neibynta wow sai ya kiwa sahkut da poi ko hadooh T.20 hadooh T. 25 lak.
