Jowai: Ha ka lyngkhooh sngi dap snem ka KSU Dima Hasao District Unit ha ka 4 tarik uni u bnai da pynkup burom ko ya 12 ngut ki khynroo khyllood wa puræ ka thaiñ kiwa da wan cha khmat ha ki puræ puthi yong ki wei ha ka jooh ka sngi da yoh leh wow pynskem ya kiwa kitkaam wa thymme ka District Unit ha Haflong.
Ki wa kitkaam ka KSU Dima Hasao District Unit ki kynthup ya u Henry Dhar (President), u Archanki Suchiang (Vice President), u Belovedson Dome (General Secretary), ka Mebalari Tariang (Assistant General Secretary), ka Merika Suchen (Education Secretary), ka Staffy Massa (Finance cum Cultural Secretary), ka Monalisa Dhar (Organising Secretary), u Arkini Rupsi (Publicity Secretary) wa 22 ngut ki Executive Member.
Da pynbaam smai ya ki da u Donald V Thabah (General Secretary, KSU Central Executive Council) wei da yoh leh ya ki klam na u Biangbor L Paliar ( Organising Secretary, KSU CEC), u Iaikmenlang Lamare (Executive member, KSU Jaiñtia Hill District Unit) wa na Pastor Rimiki Dome. Da emlang leh u Eric Nongkynrih (dkhot KSU CEC), u Reallystar Nongspung (Environment & Cultural Secretary KSU CEC), u Garland Manner (Office Secretary, KSU JHDU) wa ki dkhot ka KSU Laskein Circle.
Ka Dima Hasao District toh kawi na ka District ri-loom kawa em ha jylla Assam wei em ko markhap wa u pood u ang ka West Jaiñtia Hills District. Ka Haflong kawa man leh ka District Headquarter em ko kamwa 240 Kilometer na Shillong.
Ka Dima Hasao District toh ka District kawa em boon ki jaitbru ki heh paaid kam ki Dimasa, ki Zeme Naga, ki Hmar, ki Kuki wa ki khian paid kam ki Biate, Khasi, Karbi, Lushai, Hrangkhawl wa kiwi kiwi.
Ki Pnar kiwa chong chnong ha kani ka district em ki kamwa 5000 ngut, boon na ki toh kiwa na ri-loom Jaiñtia wei sah ki ha ki chnong Jatinga, Bubon Hill, Harangajao, Umrongso, Haflong wa kiwi de. Ka Jatinga toh ka chnong wa kawa boon tam ki paaid Pnar wei da yoh ko leh ya ka Constituency ha ka Dima Hasao Autonomous Council. U member yong ka DHAC katni na ka Jatinga constituency toh u Fleming Rupsi wei nachwa toh u Moril Massa.
Ki Pnar da poi chong chnong ki cha kani ka thaiñ nadooh ki por ki syiem Sutnga kiwa synchaar ya kani ka thaw wei da yaknieh ya ka hapyrdi ka hima Ahom, ka hima Bodo-Kachari wa ka hima Sutnga.
Discussion about this post