Ka Village Defense Party yong ka Dorbar Chnong Namdong-B da yoh ko wow pynskem ya kiwa kitkaam wa ki dkhot yong ka ha ka 14 tarik ha yung Dorbar Hall Namdong-B, ha ka yalang wa pynlai da u Asst. Waheh Chnong u Pius Ksoo wei da yoh yei klam na u Waheh Chnong u DS War wa na u Secretary u Apostol Shadap.
U Waheh Chnong da kyntu u ya kiwa yahkhmat wa ki dkhot ka VDP wow man ki kiwa paitbniah wei kiwa em yei khooid mynsien ha i kaam chakri ya i bha i miat ka chnong ka thaw khnang yow ye u wanrah ya ka chongsuk chong saaiñ hapoh ka chnong ka thaw.
Neiliang u Secretary ka chnong da e mynsien u ya kiwa yahkhmat wa ki Dkhot ka VDP kiwa hap wow dooh thiah dooh dem neibynta wow wanrah yei chong suk hapoh ka chnong, da kyntu leh wa toh u man ki kiwa chynna jngai neibynta wow chakri ya u paaid ka chnong wow pyntikna wa ki kaam sih kaam sang hapoh ka chnong ym wan jia ki.
Neiliang ka Dorbar Chnong waroh kawi da kitbok kitrwiang ko ya ki VDP Chnong wow ya krehlang neibynta i bha i miat ka chnong ka thaw.
Kiwa kitkaam wa thymme man ki kamni ha wah:
President-Dameki Siangshai
Vice President- Pyrkhat Ksoo
Secretary- Rebeca Lamare
Asst. Secretary- Kitbok Lamare
Treasurer-Perina Lamare, wa ki Executive Member kiwa em hadooh 24 ngut.
