Jowai: Kam chibytnta wow pynsñiawthooh ya kiwa kreh ka Common Service Center (CSC) ya ka aiñ Goods & Service Tax (GST) ka wow pynkrehkaam thymme ka sorkar India ka wow pynwiar noh ya kiwi ki dan hei yatoh ki mar waka khayi pateiñ, kiwa em ya ki Common Service Center 2.0 hapoh ka Digital India Programme da pynman ki da ka yalang pynsñiawthooh ha Confrence Room u DC ka WJH.
Ha kani ka sngi leh da emlang u S.C. Laloo, ADC uwa da ong wa yow lait u pyrchah ki paidbah ya iwon iwon emkaam wow pynsñiawthooh ya ki.
Yei pynsñiawthooh da leh da u O. Myphet, Inspector of Tax uwa ong wa hapoh ka jylla kiwa khayi palat T. 10 Lak chisnem haap thap ki yei pytuid ha ka website www.gst.gov.in.
Da ong u leh wa nachwa hapoh i su dan hapoh ka VAT ki dan em ki boon tylli kiwa kynton kawi hajrong ka wei pynkudor ko leh ya ki mar ki mata katwa dei wan ka GST won u wiar noh ini waroh. Ki su ya ka GST toh ye ki bru u leh lyngba ka NEFT, NRGS Debit/Credit Card wa kiwi ki rukom su online. Kiwa su da ka poisa ye ki u su du T. 10,000 donhi.
Da e ya ka hikai leh ya kiwa em CSC kammon wow yarap ya ki bru wow register ki wei kamjooh ki mar wa dang sah was u hapoh ka VAT dang u rah noh ki hapoh ka GST.
Da ong u leh wa ki mar wa mih napoh ka jylla wei da dai ya ki leh hapoh ka jylla, ya ka GST daw chim da ka sorkar jylla katwa ya ki mar wa lai cha baar ka jylla won daw yabhah ya ka dan mar chiteiñ wa ka sorkar pyrdi.
Ka GST won ym kheiñ ya ka kam ha i ya dai ya thied mrad laitnoh u kule, ki dieñ, ki jhoor, i dud, ki soh, u kwai u pathi wa kiwi jait baam wa man ka sngi.
Discussion about this post