U sarok wa pynyabi ya u sarok NH-44 wa u sarok NH-44(E) na Chahtngit cha Riatsasim, Jowai da wai biang ya oo hadien wa khang ini wa dep neidaw wa pynchna ya u khilon kamjooh deiwa tympra ya ki chrot khian kiwa da pynyieñ ha ki thaw wow psiah cha uni u sarok kiwa da pynwit wei pynswe ya ki bru wow pynemkaam ya uni u sarok.
Hawa yaklam wa u R. Pakyntein, EE PWD (R) Jowai South Division da pyntip u wa ya uni u khilon dang dep pynchna kamwa chi tayaw tam wei da dep leh wow e rong tangwa dang sah wow booh sa ki Signboard wa biang yow tip kiwa wan na baar wow lai na uni u sarok heithaw wow psiah ki na Jowai.
Uni u sarok hanla da em u la kamwa 10 snem dei thmu wow pynduna ya ki kari wa lai luti na Iawmusiang, Jowai khamtam kiwa wan wei lai cheiliang Amlarem, dang duna kiwa pynemkaam oo neidaw wa da booh da ki chrot hapyrdi yow khang ya ki kari wa heh wow lai luti neidaw wa joor wa man riat u kamtæ ki kari kam ki truck da em kiwa da sahkut wei da em leh ki wym lait ya uni u riat.
Ki kari kiwa uiñke suwari leh boon ki wym tip oo uni u sarok wei da lai luti bait ki na Iawmusiang kawa da man chwa ka thaw kawa da khynnia wei deiwa em ki Signboard wa biang wei deiwa dep leh wow tympiah ya ki chrot wa da pynyieñ ha ki thaw psiah cha uni u sarok, kiwa wan na baar leh da yooluti wow pynemkaam noh ki ya uni u sarok.
Uni u sarok dang man hi u du neibynta ki kari khian wei da chna leh ya u khilon yow lait du ki kari wa em hapoh 2 Meter i jrong u lai wei u sarok leh man u uwa da dep pyndap ya waroh kiwa pai wa sih.
Kam wow pynkynmoo wa nadooh ka 21 tarik uni u bnai ki kari Local Taxi ha Jowai leh u kamai ki waroh khlem bood de ya ka Odd/Even Number najrong wa da khynnia u sarok khamtam manda sah i jhep chadooh pyrdi sarok ha Iawmusiang, kamtæ kiwa lai luti ki wym emkaam wow lai na Iawmusiang ye ki wow pynemkaam ya uni u sarok yow pynduna yei khynnia.
Puræ leh: U dam noh ki Taxi ha Jowai wow kamai da ka Odd/Even
