Da pynthymme ya kiwa kitkaam ka JNC Tuber Circle

Ynne ka sngi, ka Jaiñtia National Council (JNC) Tuber Circle da pynthymme ko ya kiwa kitkaam neibynta ka samoi 2023-2028 heiwa u Training Phawa da chah jied biang u sa chisien yow man kam uwa yahkhmat ka Tuber Circle.

Ya kani ka yalang da pynman ha Dorbar Hall ka chnong Tuber Shohchrieh, East Jaiñtia Hills kawa pynlai da u Nangjan Dkhar uwa man u Vice President ka JNC CEC wei da yoh ya ki kyntien pdiang burom na u Mebanteilang Sukhlaiñ, Publicity and Information Secretary CEC, ya ki kyntien kyntu kynpham na u General Secretary JNC-CEC, u Wanshwa Suting uwa da sneiñ wei pynkynmoo leh wa ka Tuber toh kawi na ki chnong ka thaaiñ kawa dang ye bha u ksoh yaka niam tynre wei kamjooh yaka riti dustur yong ka Ri Jaiñtia.

Ya ki yurim yong ka seiñ da maitphang wei da pynche da u President Wahehdooh ka seiñ, u Sambormi Lyngdoh uwa da ong wa ka jaitbru kawa du chi troh tangwa ki niam em ki boon hanla kamtæ leh ymtoh wow booh ya ka niam hakhmat tangwa u booh ya ka jaitbru hakhmat dooh.

Da pyn-eh-bok pyn-eh-nasib u ya ka Circle khnang wow nang kreh chitrhem khamtam wow pynneh pynsah ya ka riti ka dustur wa ki dawbah hi yong ka jaitbru wei da chim u leh yei kaam wow pynsmai ya kiwa kitkaam.