Ka sorkar jylla dadep ko wow pyntip cha ka High Commission of Bangladesh wa cha ka Ministry of External Affairs yong ka ri India hajrong i chem yei metyap yong uwa yahkhmat ka Awami League na Bangladesh, u Ishaque Ali Khan Panna kawa man leh ka Party ka Sheikh Hasina, ka Prime Minister ka Bangladesh kawa da hap hiar chuki.
U Symbood Montri Rangbah wa pait leh ya ki Kaam Pohyung (Police), u Prestone Tynsong da kyntait u wow em iwon iwon i takit wa bniah hajrong i chem yei metyap uni uwa yahkhmat ka seiñ saiñhima ha Bangladesh.
Da khana u wa dadep wow pyntip cha ka Bangladesh High Commission hajrong i chem metyap, wei dadep wow pyntikna leh wa toh i metyap u Panna wei kiwa ha-yung u da em ki ha luti wow wan chimkti yei metyap u Panna.
Da khana u leh wa yei daw wa yap uni u bru daw tip manda yoh ya ka Forensic Report.
Kam wow pynkynmoo wa yei metyap wa da rap pyut uni u bru da chem na iwi i bri kwai wa em ha Dona Bhoi, East Jaiñtia Hills ha ka 26 tarik uni u bnai heiwa da chem leh wa ka Passport u nei metyap wei da ye wow pyntikna wa toh hi u Panna ha ka 28 tarik wei ini i thaw wa chem oo toh iwa jngai du 1.5 Km na u pood wa ka Bangladesh iwa dang haap hapoh ka Umkiang Police Station.
Ka khubor wa da yap u Panna da mih ko nadooh ka 24 tarik uni u bnai heiwa da em kiwa ong wa da yap u hadien wa oor hawa ku loom heiwa da yoh u leh ya ka Heart Attack heipor wa pyrchang u psiah cha Meghalaya ha thaaiñ Tamabil.
Hadien wa mih kani ka khubor, ki BSF da kyntait ki wa yoh u Panna wow psiah cha Meghalaya deiwa ong wa toh ka khubor thok.
Discussion about this post