Ha ka 29 Naisan ha ka chnong Chotokhela (Manakhla i pyrtuid Pnar), Sub-Division Borlekha kawa haap hapoh Moulvibazar District ka Bangladesh, da em 20-30 ngut ki nong Bangla kiwa da knieh ya i thaw rep yong ki Khasi Pnar wei da chna yung yabor ki ha ini i thaw wei ha kini ki jooh hi ki sngi da chah pam leh da ki hajar tylli ki tre pathi wa da rep ha ka chnong Agar kawa em hajan ka chnong Chotolekha.
Hadien ini i jia ki paidbah Khasi Pnar da lai ujor ki cha ki heh ka sorkar wot hadooh cha u DC ka Moulvibazar wei ha ka 6 tarik uni u bnai u DC chirup wa ki pulit kamjooh leh ki chipai ka BGB da lai sliah ki ya kini ki yung wa da chna ha i thaw wa da chah knieh wei ya ini i thaw da pynuiñ biang cha ki Khasi Pnar.
Heiyatoh wa ki bru kiwa emkti wow pam ya ki tre pathi, neiliang ki paidbah ympu em u ujor ki katwa em tangwa hanla kattæ leh ki pulit da pynman ki ya ka takit wow chemdien ya kiwa emkti.
Hawa yaklam wa ki kattu katni ngut ki bru na ka thaaiñ, da ong ki wa ka sorkar Bangladesh da chimkhia bha ki wow pyntikna wa chong chngaaiñ ki Khasi Pnar ha ka thaaiñ, wei wot hadooh ki pulit leh da chimkhia ki wow e sonteri ya ki ha ki thaw wa chong wa sah ki Khasi Pnar.
