Ka phlim wa thymme wa da pynmih na Ri-loom Jaiñtia kawa tip kam ka Skap: The Brother of Skop da pynyoo pyrthai nyngkong ka haka 30 tarik deiwa khut emlang ki kattu katni kiwa chah khut sñiawbha haka yalang wa da pynman ha CTC Orchid Inn Thadlaskeiñ heiwa da wan wai yaka da u Wailadmiki Shylla, MLA ka Jowai deiwa emlang u Puramon Kynjing, Dolloi ka Elaka Jowai, u Commander Shangpliang, President ka Meghalaya Filmmaker’s Association, u Ebormi Mukskor kam u Director wa Producer kani ka phlim neitæ kiwa embynta u ak ha kani ka phlim wa kiwi de.
U Ebormi Muksor da ong u wa da sdang wow chna ya kani ka phlim nadooh u snem 2019 tangwa hadien wa wan ka Lockdown da thut noh waroh wei da ye u pyndep ka ha uni u snem wei manda pteiñ biang u riñ leh da em boon i thut neidaw wa da em kiwa ak kiwa da ah sñiooh wym yatoh de kamwa heipor wa dang ak yaka phlim wei da hap yang biang hadooh wa man kamwa heipor wa riñ ya ka phlim.
Heiyatoh wa kani ka phlim da ong u wa man ko ka phlim Comedy tangwa da em lut ko waroh i jait wei da kular u leh wa nadooh wa sdang hadooh wa kut toh kawa sa du i rkhai bait wei ki paidbah wa wan thied Ticket leh ym sihlet ki.
Chooh chooh da ong u wa lada khia i pyrkhat pyrdaiñ manda wan pait ya kani ka phlim daw wiar lut i.
Da pyntip u wa ki paidbah daw ye ki wow pait ya kani ka phlim nadooh kani ka 1 tarik hadooh ka 6 tarik u Kmaichonglad (Dec) ha Jowai heiwa daw pynyoo ya ka ha Loompyrdi Iongpiah soo sien chi sngi heipor 11:30 i step, heipor 2:00 waje i sngi, heipor 5:00 waje i janmiet wa heipor 7:30 i miet.
Neiliang u Wailadmiki Shylla won da ong u wa kamwa da kular u heipor Election wa daw thooh laad u wanrah yaka Cinema Hall neibhah kiwa napoh Ri-loom Jaiñtia em sakhiat ki i sap i phong wow chna phlim.
Heijooh i por da ong u wa i bai pynyoo phlim ha ki Cinema Hall toh kawa syat bha heiwa hadooh 60% ka nong lai ko cha ki tre Cinema katwa kiwa chna phlim won da yoh duna bha ki najrong wa hap pynlut u chna yaka phlim, u su ya kiwa ak wa kiwi kiwi de.
Kamtæ da ong u wa da dep yaklam u wa u Montri Rangbah, u Conrad Sangma chaphang ini heiwa da ong u wow chna da ka sorkar yaka Cinema Hall ym toh iwa suk wei iwa eh leh wow pyntoh pyntne, kamtæ da rai noh wow thap ya kani hapoh ka CM-Elevate heiwa daw yarap poisa ka sorkar ya kitu kiwa kwah wow sdang ya ka Cinema deiwa booh leh i bhah ya i por wow pynyoo ya ki phlim wa mih napoh ka jylla hei dor wa duna.
Da khana u leh wa hapoh kani ka CM-Elevate da jied yaka Shillong, Tura waka Jowai yow chna ya ka Cinema Hall.
Neiliang kiwa ak ha kani ka phlim da pynsñiaw ki leh yei kmen wow yoh u embynta lang wei da yooluti ki leh ki paidbah daw hun mynsien ki hadien wa pait ki ya kani ka phlim.
Discussion about this post