Jowai: Ka East Jaiñtia Hills District Swimming Association (EJHDSA) da thoh ko cha u Member Secretary ka Meghalaya State Pollution Control Board (MSPCB) yow pynsñiaw yei pyrchah yaka Public Hearing ka Star Cement yow paan bor wow tih moochuni ha chnong Brichyrnot, East Jaiñtia Hills.
Ka EJHDSA da ong ko wa lada e laad wow tih moochuni ha kani ka chnong daw ktah ko yaka wah Lukha heiwa ka wah Lunar em ko du kamwa 500 meter na kani ka thaw tih moochuni wei kani ka wah tooid ko cha ka wah Lukha kawa da chah ktah bha nadooh wa wan ki karkhana pynmih khyndaw-bilat, kawa nachwa man ko ka laad kamai ya kiwa boon na i khwe dakha.
Da ong leh wa haka wah Lukha, ka seiñ da pynman ko ya ki yakob wa boon jait man ka snem kam ki yakob yimpa yow man ko kam ka thaw wow e sikai leh ya kiwa yimpa.
I em ka Narpuh Wildlife Sanctuary hajan kani ka thaw wa thmu wow tih moochuni daw ktah ko ya ki mrad khloo kam ki Hoolock Gibbon wa kiwi de ki mrad khloo, ki sim, ki thawalieh hadooh ki um doh wa em ha ki wah.
Ka seiñ da pynkynmoo ko yei em boon ki krem wa pawnaam ha ka thaaiñ Narpuh kiwa daw dooh jait lada sdang wow tih moochuni.
Kamtæ ka seiñ da pynsñiaw ko yei pyrchah wa joor wow pynman yaka Public Hearing kamjooh wow e bor yow tih moochuni wei wow pyndam leh ya kani ka Public Hearing.
Discussion about this post